Šmat turystaŭ źjazdžaje ź Biełarusi ŭ susiedniuju Rasiju. Paśla jany mohuć praciahvać padarožžy pa inšych krainach ci viartacca damoŭ. Ale ž dla Biełarusi takija turysty aŭtamatam traplajuć u śpisy parušalnikaŭ — bo nijak nie paviedamlajuć uładam pra toje, što pakinuli krainu.
«Prablema jość, jana nam viadomaja. Sapraŭdy, kali čałaviek vyjazdžaje praz Rasiju, jon nijak nie afarmlaje svoj vyjezd. I dla nas jon usio jašče nibyta znachodzicca na terytoryi Biełarusi. Adpaviedna, praz 90 dzion taki turyst aŭtamatyčna ličycca parušalnikam režyma znachodžańnia, i paśla atrymlivaje časovuju admovu na ŭjezd u Biełaruś.
Ciapier my pracujem nad vyrašeńniem prablemy», — raspavioŭ «Našaj Nivie» pres-sakratar MZS Biełarusi Anatol Hłaz.
Tym časam izrailskaje vydańnie «Kursor» piša pra «1,5 miljona čałaviek, jakim praz takuju sistemu ŭžo zabaranili ŭjezd u Biełaruś». Maŭlaŭ, siarod ich šmat tysiač izrailcian. I hetyja śpisy z zabaronaj nibyta ŭžo pieradali rasiejcam, adpaviedna ludziam budzie aŭtamatyčna zabaronieny ŭjezd i ŭ Rasiju taksama.
Praŭda, u pasolstvie Izraila paviedamili, što im viadoma tolki prykładna pra sotniu takich vypadkaŭ u dačynieńni da hramadzian Izraila.
Dakładnuju kolkaść tych, chto trapiŭ u śpisy, u biełaruskim MZS ahučyć nie zmahli. Maŭlaŭ, usie pytańni da MUS, a kankretna da Upraŭleńnia pa hramadzianstvu i mihracyi.
Ale što rabić, kali zamiežnik choča vyjechać u Rasiju i paśla viarnucca dachaty? Kudy źviartacca ŭ Biełarusi, kab paćvierdzić fakt adjezdu z krainy?
U MZS paraili vyśvietlić hetaje pytańnie ŭ Ministerstvie ŭnutranych spraŭ. Ale pradstaŭniki MUS i Departamienta pa hramadzianstvu i mihracyi pakul niedasiažnyja dla kamientaroŭ.
Izrailskaja ambasada, u svaju čarhu, pakul rekamienduje svaim hramadzianam pierad pajezdkaj u Biełaruś ci Rasiju źviartacca ŭ biełaruski MUS, kab pravieryć, ci nie trapiła imia padarožnika ŭ «čorny śpis».
