Bujny maršrutny pieravozčyk «Połacki ekspres» spyniŭ pracu. Z 1 kastryčnika kampanija admianiła pajezdki pamiž Połackam i Minskam, paviedamlaje «Jeŭraradyjo».
Na sajtie «Połackaha ekspresa» paviedamlajecca, što pieravozčyk spyniaje pracu časova. Kali adnoviacca pajezdki ŭ stalicu i nazad, nie havorycca.
Hałoŭnaj pryčynaj kryzisu kampanija nazyvaje prapanavanyja ŭmovy supracoŭnictva z «Minskabłpasažyrtransam».
«Mnohija punkty damovy nie tolki ŭščamlajuć intaresy našaha pradpryjemstva, ale i majuć kabalnyja prykmiety, vyjaŭlenyja va ŭklučeńni ŭ damovu punktaŭ, jakija supiarečać isnujučamu zakanadaŭstvu, spahnańni apłaty za pasłuhi, jakija pavinien apłačvać zakazčyk, uklučeńnie punktaŭ, jakija ŭščamlajuć kanstytucyjnyja pravy, a mienavita pazbaŭleńnie mahčymaści adstojvać svaje pravy pa hetaj damovie ŭ sudovym paradku», — havorycca ŭ zajavie pieravozčyka.
Skrynšot z sajta «Połacki ekspres».
U druhoj pałovie vieraśnia «Połacki ekspres» nakiravaŭ apierataru pratakoł roznahałośsiaŭ, ale adkazu ad «Minskabłpasažyrtransa» nie atrymaŭ. Źviazacca z kiraŭnictvam kampanii ŭ Jeŭraradyjo nie atrymałasia. Telefony kampanii nie adkazvajuć.
Prablemy ŭ «Połackaha ekspresa» pačalisia niekalki tydniaŭ tamu. U kancy vieraśnia pieravozčyk paviedamiŭ, što prypyniŭ braniravańnie kvitkoŭ na kastryčnik.
