Viadomyja muzyki raspaviadajuć, čamu vystupajuć za ŭviadzieńnie maratoryja na śmiarotnaje pakarańnie ŭ Biełarusi. Napiaredadni Suśvietnaha dnia suprać śmiarotnaha pakarańnia biełaruskija muzyki raspaviali, čamu vystupajuć suprać takoj miery ŭ našaj krainie. Biełaruś, jak viadoma, dahetul zastajecca apošniaj jeŭrapiejskaj i adzinaj postsavieckaj krainaj, jakaja prymianiaje śmiarotnaje pakarańnie. Ale nie tolki heta ŭpłyvaje na pazicyju tvorcaŭ.
«Choć pakarańnie i pavinna być niezvarotnym, suvymiernym ździejśnienamu złačynstvu i spraviadlivym, śmiarotnaje pakarańnie nie najlepšy sposab, — miarkuje Źmicier Chalaŭkin z papularnaha hurta Nizkiz. — Zaŭsiody jość ryzyka pamyłki, isnuje mnostva prykładaŭ. Taksama patrebnyja ludzi, jakija buduć pryvodzić prysudy da vykanańnia, a značyć, jany taksama buduć zabojcami. Śmiarotnaje pakarańnie — heta zabojstva, tolki ŭzakonienaje. A žorstkaść zaŭsiody budzie sparadžać žorstkaść».
Hurt Nizkiz paŭdzielničaje sioleta ŭ fiestyvali «Rok za žyćcio», što projdzie ŭ minskim kłubie Re:Public 7 kastryčnika ŭžo treci hod zapar i źbiare viadomych muzykaŭ, jakija vystupajuć za ŭviadzieńnie maratoryja na śmiarotnaje pakarańnie. Siarod ich — i «Pietla pristrastija».
«Ja suprać śmiarotnaha pakarańnia, tamu što potym užo ničoha nie vypravić», — łakanična vykazvajecca frontmien «Piatli» Illa Čarapko-Samachvałaŭ.
Padobnuju dumku pra niezvarotnaść vykazvaje i Jaŭhien Ciarenćjeŭ, vakalist minskaha hurta Teleport, hałoŭnych biełaruskich debiutantaŭ 2016 hoda i pieramožcaŭ konkursu fiestyvalu «Basovišča». «Karajučy śmierciu, ty sam niasieš śmierć i stanovišsia na adnu prystupku ź vinavatym. Heta adychod ad uziatych abaviazkaŭ. Karajučy śmierciu, ty nikoli nie možaš być upeŭnieny, što nie było pamyłki, i što nie ŭspłyvuć novyja fakty».
Małady hurt SnopSnoŭ, jaki pieramoh u konkursnaj častcy fiestyvalu «Basovišča-2018», pryciahnuŭšy ŭvahu publiki svaimi śmiełymi ekśpierymientami i sučasnymi aranžyroŭkami, taksama vyrašyŭ zajavić pra svaju pazicyju: «Kraina, jakaja ŭ XXI stahodździ choča być dla svaich žycharoŭ spraviadlivym arbitram, nie maje prava apuskacca da uzroŭniu tych, chto, pa jaje mierkavańni, zasłuhoŭvaje takoha pakarańnia. Jana pavinna być vyšejšaj za heta, bo zabojstva — heta zabojstva, i nijakimi vyšejšymi metami jaho niemahčyma apraŭdać», — adznačaje vakalist SnopSnoŭ Siarhiej Ivanoŭ.
Jaho dumku raźvivaje Jaŭhien Zmuška — lidar viadomaha hurta «Mutnajevoka», što braŭ udzieł jašče ŭ pieršym fiestyvali «Rok za žyćcio». «Heta niapravilna — pazbaŭlać čałavieka žyćcia, tym bolš, što ŭ bolšaści krain śvietu takoha niama. Śmiarotnaja kara — heta złačynstva suprać čałavieka».
Nahadajem, štohadovy fiestyval «Rok za žyćcio», prymierkavany da Suśvietnaha dnia baraćby suprać śmiarotnaha pakarańnia, adbudziecca sioleta ŭžo ŭ treci raz. U papiarednija hady jon taksama prachodziŭ ŭ kłubie Re:Public, svaim udziełam ideju admieny śmiarotnaha pakarańnia padtrymali «Daj Darohu!», Akute, Re1ikt,:B:N: i inšyja hurty, a taksama tysiačy ich prychilnikaŭ. Sioleta ideju ŭviadzieńnie maratoryja na vyšejšuju mieru ŭ našaj krainie padtrymlivajuć hurty Nizkiz, «Pietla Pristrastija», «Mutnajevoka», a taksama pieramožcy konkursu znakamitaha fiestyvalu «Basovišča» dvuch apošnich hadoŭ, SnopSnou i Teleport. Jany syhrajuć 7 kastryčnika u minskim kłubie Re:Public, pačatak u 17.30. Kvitki: 10-15 rubloŭ (nabyć možna tut).
Daviedka: Suśvietny dzień baraćby suprać śmiarotnaha pakarańnia adznačajecca 10 kastryčnika. Jon zasnavany Suśvietnaj kaalicyjaj suprać śmiarotnaha pakarańnia — abjadnańniem prafsajuzaŭ, miascovych i rehijanalnych orhanaŭ ułady, jurydyčnych asacyjacyj, a taksama pravaabarončych arhanizacyj z metaj paŭsiudnaj zabarony na hety vid vyšejšaj miery pakarańnia. Prychilniki ruchu vystupajuć suprać śmiarotnaha pakarańnia va ŭsich vypadkach biez vyklučeńnia, niezaležna ad charaktaru złačynstva, charaktarystyk złačyncy i sposabu, jakim dziaržava pazbaŭlaje žyćcia asudžanaha. Śmiarotnaje pakarańnie parušaje prava na žyćcio, abvieščanaje ŭ Suśvietnaj dekłaracyi pravoŭ čałavieka.
Biełaruś dahetul zastajecca apošniaj jeŭrapiejskaj i adzinaj postsavieckaj krainaj, jakaja prymianiaje śmiarotnaje pakarańnie. Pavodle źviestak pravaabaroncaŭ, za apošnija dvaccać hadoŭ u krainie pakarana bolš za 400 čałaviek. Raniej ideju admieny śmiarotnaha pakarańnia ŭ Biełarusi ŭžo padtrymlivali viadomyja muzyki, siarod jakich Lavon Volski, Uładzimir Puhač, Juryj Stylski, Źmicier Vajciuškievič, Alaksandr Pamidoraŭ, adzin ź lidaraŭ hurta «Dzieciuki» Aleś Dzianisaŭ, Hanna Chitryk, Anastasija Špakoŭskaja i inšyja.
