Pavieł Sukavienka, fota Voli Aficeravaj
Były staršy lejtenant Pavał Sukavienka raskazaŭ u sudzie pra svajo bačańnie sytuacyi ŭ rocie, piša Radyjo Svaboda.
Sud nad Paŭłam Sukavienkam i Arturam Virbałam, jakija kamandavali rotaj Koržyča da jahonaj śmierci, pačaŭsia 1 kastryčnika. Paciarpiełymi na hetym pracesie pryznali siamiora siaržantaŭ, abvinavačanymi — byłoha staršaha lejtenanta i praparščyka. Abodvuch abvinavačvajuć u złoŭžyvańni ŭładaj albo biaździejańni ŭłady. Kryminalny kodeks Respubliki Biełaruś praduhledžvaje za hetaje złačynstva da 10 hadoŭ pazbaŭleńnia voli.
Artura Virbała dapytali napiaredadni, 3 kastryčnika. Jon całkam pryznaŭ svaju vinu, choć i pryznaŭsia, što nia pamiataje bolšaści inkryminavanych jamu epizodaŭ źbivańnia padnačaleny albo prymusu ich da vykanańnia fizyčnych praktykavańniaŭ
«U siarednim štomiesiac ja zabiraŭ kala adnaho rubla z zarobku kožnaha sałdata, časam kapiejki, — skazaŭ Sukavienka. — U mianie prosta nie było rešty. Hrošy, jakija treba było vydavać siaržantam padčas zvalnieńniaŭ, ja nie vydavaŭ tamu, što tak było pryniata ŭ častcy.
Hetyja hrošy išli na patreby častki. Siaržanty pra heta viedali i nie pratestavali. Ja nia viedaju, čamu jany ciapier heta admaŭlajuć. Usie viedali, kudy iduć hetyja hrošy. Pryntery zapraŭlali, kuplali benzin dla benzakasy, jašče niešta».
Sukavienka zajaviŭ, što pryznaje svaju vinu ŭ tym, što niedadavaŭ sałdatam i siaržantam častku hrošaj (štomiesiac kožny šarahoviec atrymlivaŭ kala 9 rubloŭ, siaržant — kala 15. — RS). I hatovy kampensavać paciarpiełym tyja sumy, jakija jany nazavuć
«Pryznaju svaju vinu ŭ tym, što atrymlivaŭ ad padnačalenych pradukty, — praciahnuŭ raskazvać pra svaje ŭčynki Pavał Sukavienka. — Kavu, cyharety. Taksama hatovy kampensavać usie straty. Pryznaju siabie vinavatym i raskajvajusia ŭ hetym.
Što datyčyć fizyčnych praktykavańniaŭ, adciskańniaŭ, udaraŭ draŭlanaj pałkaj — ja pamiataju nia ŭsie nazvanyja ŭ materyjałach spravy vypadki. Ale pryznaju, što heta mahło być. Kamu mienavita nanosiŭ udary pałkaj (havorka pra ŭdary admysłovaj draŭlanaj pałkaj pa jahadzicach, jakija vykarystoŭvalisia ŭ jakaści pakarańnia za dapuščanyja siaržantami parušeńni. — RS), ja nia pamiataju, ale heta było.
Heta nie vykarystoŭvałasia mnoj jak miera pakarańnia. Nie dla taho, kab pryčynić maralnyja pieražyvańni albo fizyčny bol. U toj momant heta bolš było padobna na śmiešnuju sytuacyju. Usie ŭśmichalisia i śmiajalisia»
Dajučy sudu pakazańni, Pavał Sukavienka padkreśliŭ, što zahady stać va ŭpor ležačy i ŭdary pałkaj pa jahadzicach vykarystoŭvalisia dla naładžvańnia dyscypliny, a nie dla taho, kab uzvysicca albo «zadavolić svaje nizkija schilnaści i padtrymać takim čynam svoj aŭtarytet».
«Ja ŭmieŭ i moh navieści paradak, ale tolki ŭ svaim nievialikim padraździaleńni, — skazaŭ Sukavienka. — Nie va ŭsich Uzbrojenych siłach. Usie maje dziejańni siaržanty mahli abskardzić, ale nie zrabili hetaha. Ja raskajvajusia ŭ tym, što zrabiŭ. Hatovy panieści pakarańnie».
Pasłuchać pakazańni byłoha aficera Paŭła Sukavienki pryšli kala 15 kursantaŭ Vajskovaj akademii, jakuju abvinavačany skončyŭ u 2015 hodzie. Z šerahaŭ Uzbrojenych sił Sukavienka byŭ zvolnieny 13 kastryčnika 2017 hodu, nieŭzabavie paśla śmierci Alaksandra Koržyča i pierad samym zatrymańniem supracoŭnikami KDB.
