«Pryhladaju sabie ŭčastak pad budaŭnictva doma, unutry druhoj kalcavoj. Rehularna vyvučaju abjavy. I znajšoŭ idealnuju — 15 sotak za 8 kiłamietraŭ ad Minska, usiaho za 12 tysiač dalaraŭ. Ale nadzieł akazaŭsia nie bieź siurpryzu. Uvohule, zdajecca, novy vid razvodaŭ źjaviŭsia», — raspavioŭ čytač partała TUT.BY Alaksiej.
Alaksiej kaža, što stelefanavaŭsia z čałaviekam, jaki nazvaŭsia Vadzimam, uładalnikam učastka. Toj z chodu prapanavaŭ jechać hladzieć i ŭžo tam abmiarkoŭvać niuansy.
— Užyvuju nadzieł vyhladaŭ šykoŭna — na krai malaŭničaj viosački, abniesieny aharodžaj, roŭny, kvadratny. Ja pytajusia ŭ Vadzima: a abciažarańni jakija pa ŭčastku? Moža, vydavaŭsia jak tym, chto žyvie ŭ niastačy? Nie, kaža, voś babulin dom, u spadčynu zastaŭsia, i dva ŭčastki da jaho ŭ pryvatnaj ułasnaści. Pytajusia ŭžo ŭ łob: dyk u čym padvoch? Jon kaža: nu, jość nievialikaja tonkaść, hetyja sotki paznačanyja jak dla viadzieńnia asabistaj padsobnaj haspadarki. Ale heta ž nie biada, maŭlaŭ, ty ž čytaŭ — vakoł viosak buduć narazać učastki na aŭkcyjony — pad šumok i źmieniš metavaje pryznačeńnie ŭčastka.
Alaksiej kaža, što Vadzim byŭ abajalny.
— Raskazvaŭ pra suviazi ŭ rajvykankamie i sielsaviecie i što «pytańnie źmieny metavaha pryznačeńnia ŭčastka vyrašalnaje, usiudy ž svaje ludzi». Abiacaŭ źnižku, padtrymku pry pieraafarmleńni ŭčastka. Uvohule, bałbataŭ jak typovy machlar. Ja admoviŭsia, a potym usie jaho abjavy vyparylisia. Ci to znajšoŭ naiŭnaha, ci to znajšli ŭpravu na jaho samoha.
Što takoje ŭčastak pad APH?
— Ziamielnyja ŭčastki pad viadzieńnie asabistaj padsobnaj haspadarki pryznačanyja dla vyroščvańnia pładova-jahadnych nasadžeńniaŭ, vyroščvańnia sielskahaspadarčych kultur, a taksama raźmiaščeńnia pabudoŭ dla składavańnia invientara i zachoŭvańnia ŭradžaju, — patłumačyła ekśpiert hrupy kampanij «Tvaja stalica». — Uźviadzieńnie pabudoŭ žyłoha pryznačeńnia na takich učastkach nie dazvalajecca.
U zakanadaŭstvie skazana, što «hramadzianie, jakija ažyćciaŭlajuć viadzieńnie asabistaj padsobnaj haspadarki, majuć prava ŭzvodzić u vyznačanym zakanadaŭstvam Respubliki Biełaruś paradku haspadarčyja budynki i zbudavańni, nieabchodnyja dla viadzieńnia asabistaj padsobnaj haspadarki, na ziamielnych učastkach, pradastaŭlenych dla hetych metaŭ u adpaviednaści z zakanadaŭstvam Respubliki Biełaruś ab achovie i vykarystańni ziemlaŭ».
Pradavać i kuplać ŭčastki pad APH zakonam nie zabaroniena.
Pabudavać možna chleŭ. I žyć u chlavie
U ryełtarskich bazach my znajšli jašče niekalki abjaŭ ab prodažy učastkaŭ pad APH. Ale ryełtary adrazu i sumlenna papiaredžvajuć: kali vy pabudujecie na takim učastku chatu, vy jaje nie zmožacie zarehistravać. Usio, što budzie tut pabudavana, aŭtamatyčna — haspabudova. Akramia taho, kab kupić hety ŭčastak, treba zarehistravacca ŭ hetaj vioscy (ci ŭ susiedniaj, hałoŭnaje, kab jana adnosiłasia da hetaha ž sielsavieta).
U teoryi, kali pabudujecie domik i pasieliciesia tam, znosić vas nie pryjeduć. Čałaviek ža maje prava pastajanna žyć choć u budcy, choć u chlavie, choć na vulicy na kardoncy.
Ryełtary ŭspaminajuć: jašče da 2014-ha zakanadaŭstva dazvalała ŭ asablivych vypadkach mianiać metavaje pryznačeńnie takich nadziełaŭ. I ŭ teoryi zakanadaŭstva moža jašče raz źmianicca. Ale na teoryju lepš nie raźličvać.
Uvohule, čytač Alaksiej maje racyju zbolšaha: prodaž učastka pad APH, zapakavany ŭ abiacańni, što možna budzie pabudavany tam dom zarehistravać, — heta padman. A voś sam prodaž — całkam zakonny.
