Ministerstva justycyi ZŠA vystaviła abvinavačvańni siami rasijanam, jakija, pa infarmacyi viedamstva, źjaŭlajucca supracoŭnikami HRU. Pra heta na pres-kanfierencyi paviedamiŭ pamočnik hienprakurora ZŠA Džon Demiers.
Imiony čaćviarych abvinavačanych užo raniej ahučyŭ ministr abarony Niderłandaŭ na pres-kanfierencyi. Ich nazvali supracoŭnikami HRU, jakija pasprabavali ŭzłamać sietki Arhanizacyi pa zabaronie chimičnaj zbroi. Jašče troje abvinavačanych fihuravali ŭ śpisie 12 chakieraŭ HRU, jakich śpiecprakuror ZŠA Robiert Miuler abvinavaciŭ va ŭzłomie siervieraŭ Demakratyčnaj partyi ZŠA.
Čytajcie taksama: Niderłandy vysłali čatyroch rabotnikaŭ HRU
Viedamstva abvinavačvaje siemiarych rasijan u chakierstvie, kradziažy pryvatnaj i sakretnaj infarmacyi, publikacyi infarmacyi dla vykarystańnia jaje suprać niadobrazyčliŭcaŭ Rasii i źmieny hramadskaj dumki na karyść Rasii.
Celami rasijskich chakieraŭ byli ŭ tym liku atlety i antydopinhavyja ahienctvy. Achviarami stali prykładna 250 spartsmienaŭ z 30 krain, WADA, Spartyŭny arbitražny sud, FIFA, zajaviŭ prakuror Skot Brejdzi. «Inšymi słovami, Rasija zmachlavała, ich złavili, im zabaranili ŭdzielničać u Alimpijadzie, jany razzłavalisia i adpomścili. Praz pomstu jany parušyli zakon, tamu jany złačyncy», — skazaŭ Brejdzi.
