U mienskim multymedyjnym pres-centry Sputnik Biełaruś 3 kastryčnika prajšoŭ kruhły stoł treciaha festyvalu dakumentalnaha kino krain SND «Jevrazija.DOC», paviedamlaje «Radyjo Svaboda».
Festyval pravodzicca pry finansavaj padtrymcy Miždziaržaŭnaha fondu humanitarnaha supracoŭnictva krain SND. Jaho aktyŭna reklamavała i federalnaje ahienctva «Rossotrudničiestvo», jakoje adkazvaje za farmavańnie imidžu Rasiei i padtrymku rasiejcaŭ za miažoj.
Vyznačajučy mety festyvalu, staršynia žury Ŭładzimir Mamantaŭ vykazaŭsia za stvareńnie ahulnaha mentalitetu dla intehracyi.
Pieršy festyval u Smalensku byŭ pryśviečany «kalarovym» revalucyjam jak «instrumentu destabilizacyi i źmieny ŭłady ŭ roznych krainach śvietu».
Potym placoŭkaj festyvalu zrabili Miensk. Vybranyja sioleta dla festyvalu filmy tranślujuć pohlad kramloŭskaj prapahandy na vajnu ŭ Syryi, «kalarovyja» revalucyi, «likvidacyju rasiejskamoŭnaj adukacyi ŭ Łatvii», majuć vyraznuju antyamerykanskuju i antyzachodniuju skiravanaść.
U ramkach festyvalu prajšoŭ kruhły stoł pad nazvaj «Dakumentalnaje kino ŭ epochu postpraŭdy», na jakim, siarod inšaha, razvažali, jak zmahacca z fejkami.
Dźvie klučavyja fihury ŭ hetaj dyskusii ź biełaruskaha boku — były staršynia Biełteleradyjokampanii, a ciapier čalec Savietu Respubliki i staršynia «Biełaj Rusi» Hienadź Davydźka i sakratar aficyjnaha Biełaruskaha sajuzu žurnalistaŭ, palityčny ahladalnik BT z pułu Łukašenki Andrej Kryvašejeŭ.
Davydźka: «Błohiery — dzieci fejkaŭ»
Hienadź Davydźka ličyć, što dakumentalnaje kino źbiraje dakumenty «z metaj maksymalnaha ŭpłyvu na śviet», kab jaho «nakiravać u pravilnaje rečyšča».
Hienadź Davydźka (źleva).
«I dobra, kali hety talenavity čałaviek staić na pazycyjach stvaralnych, u jakoha jość maralnyja pryncypy. Čamu vielmi važna z žurnalistyki, z fakultetu žurnalistyki, fakultetaŭ ekrannych VNU chutka znachodzić maładych ludziej, jakija dumajuć pa-ekstremiscku, i adličvać. Strašna, kali jany talenavityja i kali pačnuć słužyć złu. Kamu jon budzie słužyć? Bo epocha postńjus, fejkaŭ — heta strašna», — skazaŭ Hienadź Davydźka.
Pavodle Davydźki, nieabchodna «źvieryć našy hadzińniki, prahladzieć, kamu my słužym u hety čas, i «atu jaho, atu» kryčać svoječasova tym, chto sprabuje znajści lohkuju słavu na nišy chłuśni».
«Ciapier vielmi pryjemna i prosta: ty zrabiŭ niejkuju hadaść u internecie — i ty słavuty. Plunuŭ prosta niejkaj hadaściu ŭ internecie, ty za heta nie adkazvaješ, ale ty papularny čałaviek, ty błohier. I jaho ŭsie viedajuć. I heta dzieci fejku. Voś stavić takomu emacyjnuju, sensavuju i praŭnuju acenku. Chaciełasia b, kab u nas na hety kont była vypracavana niejkaja systema ŭ žurnalisckim i režyserskim kole. Nu i ŭ zakanadaŭstvie taksama».
Hienadź Davydźka ŭznačalvaŭ Biełteleradyjokampaniju sa śniežnia 2010 da lutaha 2018 hodu.