Čempijon Biełarusi nie zmoh ničoha zrabić suprać adnoj z najmacniejšych kamand Hrecyi. U druhim tury hrupavoha etapa Lihi Jeŭropy BATE prajhraŭ z bujnym likam PAOKu.
Fota: sajt PAOK.
U składzie BATE adsutničaŭ centralny abaronca, sierb Niemańja Miłunavič. Jaho miesca ŭ asnovie zaniaŭ Dzianis Palakoŭ. Mabyć, hetaja zamiena stała adnoj z klučavych.
U pramiežak ad 5 da 15 chviliny BATE prapuściŭ trojčy. Pryčym va ŭsich hałach prysutničała vina Palakova. Heta byli ŭsie try ŭdary PAOKa ŭ pieršym tajmie.
Było padobna, što moh zdarycca taki ž kašmar, jak paru hadoŭ tamu ŭ sustrečach z «Portu» i danieckim «Šachcioram».
Admietna, što ni ŭ pieršym tajmie, ni ŭ pierapynku trenier BATE Alaksiej Baha nie rabiŭ nijakich zamien u hulni. Pieršaja zamiena adbyłasia ŭ siaredzinie druhoha tajma, kali na poli źjaviŭsia Maksim Skavyš. Mienavita jon staŭ aŭtaram hoła, jaki daŭ nievialiki pramień nadziei, što ŭsio moža skončycca nie tak kiepska.
Adnak u chutkim časie hreki zabili i čacvierty miač. Matč skončyŭsia ź likam 1:4 nie na karyść BATE. Adna z samych balučych paraz u historyi biełaruskich kłubaŭ u jeŭrakubkach.
Na hulni prysutničała kala 9 tysiač hledačoŭ. Na 53-j chvilinie hulni hledačy ŭšanavali apładyśmientami pamiać Anatola Kapskaha.
U druhim matčy hrupy «Čełsi» minimalna pieramoh vienhierski «Vidzi» 1:0. Ciapier u «Čełsi» 6 punktaŭ, u BATE i PAOKa pa 3, u «Vidzi» — 0.
Nastupnyja dźvie hulni BATE praviadzie suprać «Čełsi».
