Ministr zamiežnych spraŭ Uładzimir Makiej raspavioŭ u intervju prahramie «Kontury» telekanała ANT ab vynikach sustrečy ministraŭ krain — udzielnic Uschodniaha partniorstva, jakaja prajšła ŭ Luksiemburhu. Jak čakałasia, pahadnieńnie ab pryjarytetach partniorstva ź ES moža być padpisana ŭžo sioleta, źviartaje ŭvahu TUT.BY.

«Jak by chto ni chacieŭ, hetaja inicyjatyva (Uschodniaje partniorstva) nie pieratvaryłasia ŭ kanfrantacyjnuju kancepcyju, nakiravanuju suprać trecich krain. My i siońnia ŭ čarhovy raz padkreślili, što jana pavinna nasić niekanfrantacyjny charaktar, być nakiravana na zbližeńnie, abjadnańnie», — adznačyŭ Makiej.

Jon asabliva pachvaliŭ prahramu ekanamičnaha ŭzajemadziejańnia i zaklikaŭ bolš uvahi nadavać mienavita hetym prajektam. «Jość niejkija zruchi, ale realnaha prahresu, jaki byŭ by zaŭvažany našymi prostymi ludźmi, niama», — pryznaŭ ministr.

Kamientujučy prahres u pahadnieńni ab pryjarytetach supracoŭnictva ź ES, jaki stanie bazaj dla budučych adnosinaŭ Biełarusi i ES, Makiej adznačyŭ, što ź jeŭrakamisaram Johaniesam Chanam jany havaryli pa ŭsim śpiektry supracoŭnictva, u tym liku pra pierśpiektyvy padpisańnia ŭ bližejšy čas pryjarytetaŭ partniorstva. «Na žal, našy partniory ŭklučyli ŭ apošni čas niekatoryja pasažy, jakija my pavinny dadatkova vyvučyć. Ciapier adbyvajucca adpaviednyja ŭnutrydziaržaŭnyja pracedury», — zajaviŭ ministr. Pry hetym jon adznačyŭ, što ŭ apošni čas pamiž Biełaruśsiu i ES z adnosinaŭ syšli ŭzajemnyja paproki.

Uładzimir Makiej pravioŭ u Luksiemburhu šerah pieramovaŭ. Na ich u tym liku abmiarkoŭvalisia mahčymyja vizity prezidenta Biełarusi ŭ krainy ES, dadaje BIEŁTA.

«Jość rečy, na jakija my hladzim vielmi ŭvažliva: jakaja tematyka vizitu, ci budzie kankretnaja karyść ci addača ad taho ci inšaha vizitu. Prapanovy, dakładvajucca prezidentu. Pazicyja kiraŭnika biełaruskaj dziaržavy zaŭsiody składajecca ŭ tym, što niama sensu rabić vizit dziela vizitu. Vizit pavinien prynieści kankretnyja dyvidendy, vyniki dla krainy i naroda. i hetyja vyniki pavinny być adčuvalnyja i značnyja», — padkreśliŭ ministr.

Uschodniamu partniorstvu — inicyjatyvie Jeŭrapiejskaha sajuza pa raźvićci intehracyjnych suviaziaŭ Jeŭrasajuza z šaściu krainami byłoha SSSR: Azierbajdžanam, Armienijaj, Biełaruśsiu, Hruzijaj, Małdovaj i Ukrainaj — u nastupnym hodzie budzie ŭžo 10 hadoŭ. Małdova, Hruzija i Ukraina za hety čas ŭziali aryjencir na intehracyju ź ES, atrymali biaźvizavy režym. Armienija padpisała damovu ab usioabdymnym partniorstvie.

Клас
0
Панылы сорам
0
Ха-ха
0
Ого
0
Сумна
0
Абуральна
0