Pažyły mužčyna ŭ lesie zhubiŭ svajho svajaka i vyrašyŭ viartacca dadomu adzin. Druhi hrybnik padumaŭ, što toj zabłukaŭ, i źviarnuŭsia ŭ milicyju.
Mužčyny-svajaki z Babrujska pajšli ŭ hryby ŭ rajonie vioski Łomy. Adzin ź ich — piensijanier 1937 hoda naradžeńnia, zabyŭsia ŭziać z saboj mabilny telefon. Hrybniki tak zachapilisia hrybami, što zhubili adzin adnaho.
Piensijanier nie moh patelefanavać svajaku i vyrašyŭ iści dadomu. A inšy mužčyna doŭha i biespaśpiachova šukaŭ jaho ŭ lesie, pačaŭ chvalavacca. U 16.35 jon patelefanavaŭ u milicyju i paviedamiŭ, što jaho pažyły svajak zabłudziŭsia.
Na miesca vyjechali niekalki supracoŭnikaŭ RAUS, na dapamohu im źbiralisia jašče 10 čałaviek. Milicyja šukała piensijaniera ŭ lesie kala hadziny, i biespaśpiachova.
Kala 18 hadzin adzin ź milicyjanieraŭ vyrašyŭ patelefanavać mužčynu na mabilny, choć i viedaŭ, što toj zabyŭsia jaho doma. Niečakana adkazaŭ źnikły hrybnik. Akazałasia, jon da taho času ŭžo pryjšoŭ dadomu, na zavułak Kłubny, i navat nie padazravaŭ, što jaho šukajuć.
