«Znakamitaść? Ja siabie joj nie adčuvaju. Žyvu takim samym žyćciom, jak i raniej, — treniroŭki i rabota pa raskładzie», — kaža Jaŭhien Łoś, pažarny-ratavalnik z Babrujska. U listapadzie jon trapiŭ u Knihu rekordaŭ Hiniesa. Za chvilinu chłopiec zmoh adcisnucca na brusach 67 razoŭ z dadatkovaj vahoj 18,2 kiłahrama. Piša hazieta «Źviazda». 

Pa pieršaj adukacyi Jaŭhien — technik-elektryk. Skončyŭ kaledž, dva hady adpracavaŭ na budoŭli. I syšoŭ: nie jaho heta. Budučuju prafiesiju chłopiec zachacieŭ źviazać sa sportam. Pastupiŭ na fakultet fizičnaha vychavańnia BDPU imia Maksima Tanka. A ŭ 2012 hodzie pryjšoŭ u pažarnuju čaść — pa ekstrym i pracu na karyść hramadstva.

Svoj pieršy vyklik vyrazna pamiataje dahetul:

— Ja tady jašče kursantam byŭ, «na telefonie» siadzieŭ. Pryjšło paviedamleńnie: pažar na vulicy Čapajeva. Byŭ poźni viečar, my adździaleńniem vyjechali na miesca, a tam dom haryć adkrytym połymiem, šyfier stralaje. Ja hladzieŭ na kaleh — dla ich heta była zvyčajnaja sprava, jany nie mitusilisia. A ŭ mianie emocyj «vyšej dachu», stolki lišnich ruchaŭ było… Biehaŭ, va ŭsich pytaŭsia, što mnie rabić, što brać.

Dośvied pryjšoŭ chutka. Jak i zvyčka być zaŭsiody napahatovie, navat u štodzionnym žyćci. Praŭda, žonka i baćki za Ženiu ŭsio roŭna chvalujucca, tamu paśla vyklikaŭ jon zaŭsiody pierazvońvaje rodnym, kab skazać, što ŭsio dobra.

Sportam chłopiec zajmajecca jašče sa školnych hadoŭ. Chadziŭ ź siabrami na turniki, vučyŭsia vykonvać truki.

— My hladzieli na starejšych chłopcaŭ, jakija ŭžo adsłužyli ŭ armii, rabili na placoŭcy krutyja elemienty, byli fizična raźvityja, kłasna vyhladali, i chacieli być padobnymi da ich, — pryznajecca Jaŭhien. — Turniki vybrali, bo heta dastupna. Tady jašče nie tak šmat trenažornych załaŭ było. Dyj cikava pryjści kampanijaj, u tuju ž «leśvicu» pahulać — chto bolš zrobić. Taki azart! Sam nie zaŭvažaješ, jak, spaborničajučy, na novy ŭzrovień vychodziš.

U 2014 hodzie Jaŭhien Łoś pastaviŭ rekord Biełarusi — adcisnuŭsia 26 razoŭ z 48 kiłahramami dadatkovaj vahi na pojasie. «U dadzieny momant na treniroŭcy rablu bolš za tryccatku, — zaŭvažaje. — Pryjemna bačyć prahres».

Sportam chłopiec zajmajecca kožny dzień. Staŭku robić na abjomnyja treniroŭki (heta značyć, ź vialikaj kolkaściu padychodaŭ i paŭtareńniaŭ). Zaniatki na raźvićcio siły ciahnucca 40 chvilin, na siłavuju vynoślivaść — dźvie-try hadziny. Na minułym tydni, naprykład, padčas takoj prahonki Jaŭhien z hiraj 24 kiłahramy padciahnuŭsia 250 razoŭ.

Za dva tydni da spabornictvaŭ atlet zbaŭlaje temp, a za tydzień naohuł pierapyniaje treniroŭki. Nie lažyć na kanapie — addaje pieravahu aktyŭnamu adpačynku. Chodzić u basiejn, parycca ŭ łaźni, hulaje ŭ tenis.

Zamachnucca na miesca ŭ Knizie rekordaŭ Hiniesa Jaŭhien vyrašyŭ paśla taho, jak tudy trapiŭ jaho siabar spartsmien Maksim Truchanaviec.

— Mnie stała cikava, zajšoŭ na sajt, pahladzieŭ, jakija tam jość rekordy ŭ maim siłavym kirunku. Ubačyŭ, što jość niekalki dasiahnieńniaŭ, jakija mahu pabić ź minimalnaj padrychtoŭkaj, — raskazvaje chłopiec.

Dla siabie jon vybraŭ adciskańni na brusach z dadatkovaj vahoj 40 funtaŭ (kala 18,2 kiłahrama). Papiaredni rekord byŭ 49 razoŭ.

Jaŭhien zarehistravaŭsia na sajcie ŭ sakaviku. Adkaz atrymaŭ praz try miesiacy — z poŭnym pieralikam usich umoŭ i dakumientaŭ, jakija treba budzie pieradać kamisii. Chłopiec pryznajecca: samym składanym dla jaho akazalisia mienavita arhanizacyjnyja momanty. Tak, naprykład, rekord pavinny fiksavać dva chranamietrysty, dva sudździ (śpiecyjalisty z vyšejšaj adukacyjaj, siertyfikavanyja ŭ śfiery fizkultury i sportu), try kamiery: śpieradu ad atleta, zboku i zzadu.

Da sproby babrujčanin rychtavaŭsia kala dvuch tydniaŭ. Dadatkovaja vaha dla jaho akazałasia nie nadta vialikaj, ale raniej jon nie adciskaŭsia z zaplečnikam (tolki z hiraj ci pojasam), tamu treba było adaptavacca. Pieršy, u adroźnieńnie ad inšych uciažarvalnikaŭ, krychu źmiaščaje centr ciažkaści, i vykonvać praktykavańnie ź im składaniej.

Sprob u Jaŭhiena było try. Pieršy raz za chvilinu jon paśpieŭ adcisnucca 56 razoŭ. Užo dobry vynik, ale siabry zapeŭnivali: ty možaš lepš. I niezdarma. Na treci raz chłopiec zrabiŭ na 11 paŭtareńniaŭ bolš.

Paśla taho jak videa i ŭsie dakumienty byli adpraŭleny, čakać paćviardžeńnia daviałosia try miesiacy. Heta jašče samy chutki varyjant dla biaspłatnaj zajaŭki. Kab paskoryć praces, treba zapłacić kala tysiačy dołaraŭ, — tady zapyt razhledziać na praciahu piaci pracoŭnych dzion. A za dziesiać tysiač dołaraŭ kamisija sama prylacić da vas dadomu.

Papadańnie ŭ Knihu rekordaŭ Hiniesa nie maje na ŭvazie hrašovych vypłat. Ale, ličyć Jaŭhien, heta vielmi hanarova — akazacca ŭ śpisie samych-samych.

— A što, kali vaš rekord pabjuć?

— Daviadziecca pastavić nanoŭ, — uśmichajecca chłopiec u adkaz. — Jość jašče paračka rekordaŭ, jakija mahu pabić, ale zahadvać nie budu. Patrebny čas, kab padrychtavacca.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?