Lešek Šarepka
Kolišni pasoł Polščy ŭ Miensku Lešek Šarepka prakamientavaŭ na svajoj staroncy ŭ fejsbuku biełaruska-rasiejskija sprečki, vyklikanyja padatkovym manieŭram i prapanovaj Dźmitryja Miadźviedzieva nakont bolš ščylnaj intehracyi Minska i Maskvy abo pierachodu pamiž dziaržavami na rynkavyja ŭmovy, piša Radyjo Svaboda.
«U ŚMI ciapier usio bolš spekulacyjaŭ nakont budučyni Biełarusi. Žurnalisty šukajuć adkaz na pytańnie, ci Pucin źjeść jaje na pieršaje, ci na druhoje, — piša dyplamat. — Niekatoryja pačynajuć hladzieć na prezydenta Łukašenku jak na adzinaha haranta biełaruskaj niezaležnaści. Napeŭna, i tavaryš Łukašenka lubić ciapier nadziavać takuju masku, ale heta pamyłkovaje ŭjaŭleńnie. Alaksandar Łukašenka źbiraje ciapier plon ułasnaj doŭhaterminovaj palityki. I kali niechta i zasłužyŭ zvańnie mahilščyka biełaruskaj niezaležnaści i suverenitetu, to heta mienavita jon. Pucin moža ciapier tolki vykarystać nahodu, jakuju stvaryŭ biełaruski dyktatar».
Praź niekalki dzion Lešek Šerepka praciahnuŭ svaje razvažańni adkazam na pytańnie, što ŭ takoj sytuacyi rabić.
«Dastatkova ŭziać prykład z armianskaha narodu (inšaja sprava, ci zdolnyja na heta biełarusy?), jaki mirna nahadaŭ uładzie, chto jość suverenam u dziaržavie. Takoje raźvićcio sytuacyi dapamahło b taksama Ŭkrainie, a biełarusam dazvoliła b zmahacca za spraviadlivyja ŭmovy supracy z Maskvoju. Nielha ni ŭ jakim razie pakidać hetyja pytańni Łukašenku, da jakoha niama absalutna nijakaha davieru».
Uviesnu 2018-ha sotni tysiač armian vyjšli na vulicy, i Armenija raźvitałasia z 10-hadovym prezydenctvam Serža Sarhśjana. Pratesty ŭznačaliŭ Nikoł Pašyńjan. Na vybarach u śniežni letaś jahonaja partyja atrymała 70% miescaŭ u armianskim parlamencie.
Lešek Šerepka pracavaŭ ambasadaram u Miensku ŭ 2011—2015 hh. U kryzisny čas biełaruskija ŭłady «paprasili» jaho pakinuć Biełaruś. Šerepka vymušany byŭ źjechać z krainy razam z Majraj Moraj — kiraŭnicaj pradstaŭnictva Eŭraźviazu ŭ Biełarusi. Paśla taho jak sytuacyja paspakajnieła, ambasadar viarnuŭsia ŭ Biełaruś.
