Ekałahičny dakład pa stratehičnaj ekałahičnaj acency prajekta stratehii abychodžańnia z adpracavanym jadziernym palivam BiełAES abmiarkujuć siońnia a 14-j hadzinie ŭ kinakancertnaj zale Astraŭca. Dakład apublikavali na sajcie Biełaruskaj atamnaj stancyi.
U stratehii razhladajuć try varyjanty abychodžańnia z adpracavanym jadziernym palivam ź BiełAES. Usie varyjanty zvodziacca da taho, što paliva ŭ lubym vypadku budzie zachoŭvacca ŭ Biełarusi.
Kolkaść ciepłavydzialalnych zborak, vyhružanych za 60 hadoŭ pracy dvuch enierhabłokaŭ BiełAES, składzie aryjencirovačna 5300 adzinak ahulnaj masaj prykładna 2500 ton ciažkaha mietału.
Varyjant 1. Nakiroŭvańnie apramienienaj ciepłavydzialajučaj zborki Biełaruskaj AES na pierapracoŭku ŭ Rasiju, z ulikam praciahłaha zachoŭvańnia adpracavanaha jadziernaha paliva (AJAP) u Rasii, z nastupnym viartańniem vysokaaktyŭnych adchodaŭ i ich zachavańniem u Biełarusi.
Varyjant 2. Nakiroŭvańnie apramienienaj ciepłavydzialajučaj zborki BiełAES na pierapracoŭku ŭ Rasiju, z ulikam praciahłaha «suchoha» zachoŭvańnia AJAP na terytoryi Biełarusi i z nastupnym viartańniem i zachavańniem vysokaaktyŭnych adchodaŭ u Biełarusi.
Varyjant 3. Doŭhaje zachoŭvańnie apramienienaj ciepłavydzialajučaj zborki, u tym liku z nastupnym zachavańniem ŭ Biełarusi (biez adpraŭki ŭ Rasiju).
Admova ad ekspłuatacyi BiełAES, jakaja źjaŭlajecca krynicaj utvareńnia adpracavanaha jadziernaha paliva, niemahčymaja, adznačajecca ŭ dakładzie.
Zaćvierdzić prajekt stratehii paśla hramadskaha abmierkavańnia pavinny ŭ pieršym kvartale 2019 hoda. Zaŭvahi i prapanovy pa stratehii možna nakiravać da zaŭtra, 15 studzienia.
Biełaruskaja AES budujecca pa rasijskim prajekcie ŭ Astraŭcy. Pieršy enierhabłok pavinny ŭvieści ŭ stroj u 2019 hodzie.
