U pieršy dzień novaha hoda kala 18.30 niepadalok ad Hrodna dva aŭtamabili ździejśnili najezd na maładoha zubra, jaki vyjšaŭ na darohu.
Spačatku jaho źbiŭ Ford, ale zubr padniaŭsia i pajšoŭ, paśla čaho paźbiehnuć najezdu nie zmoh kiroŭca Opel. Paśla druhoha ŭdaru zubr upaŭ. Avaryja adbyłasia ŭ zonie dziejańnia znaka «Dzikija žyvioły».
Paśla avaryi mnohich cikaviła, ci buduć pakaranyja kiroŭcy, jakija najechali na žyviolinu. Jak paviedamlaje «Hrodzienskaja praŭda» sa spasyłkaj na namieśnika staršyni abłasnoha kamiteta pryrodnych resursaŭ i achovy navakolnaha asiarodździa Alaksandra Adamienka, škoda ad zhuby «čyrvanaknižnaj» žyvioły aceńvajecca ŭ 400 bazavych vieličyń, a heta bolš za 10 tysiač rubloŭ, i nie zaležyć ad vahi.
Ci daviadziecca kiroŭcam kampiensavać škodu pryrodzie? Jak vyśviatlajecca, nie. U DAI Hrodzienskaj vobłaści, pradstaŭniki jakoj vyjazdžali na miesca DTZ, žurnalistam «Hrodzienskaj praŭdy» raspaviali, što kiroŭcy nie buduć płacić za hibiel zubra. Bolš za toje, ich nie pryciahnuć da administracyjnaj adkaznaści.
Situacyju prakamientavaŭ načalnik adździeła pa rasśledavańni darožna-transpartnych zdareńniaŭ abłasnoj DAI Uładzimir Patrubiejka:
«DTZ adbyłosia nie pa vinie kiroŭcy, jon nie parušyŭ Praviły darožnaha ruchu. U takich situacyjach ŭsio adbyvajecca ŭ karotkaje imhnieńnie, kiroŭca nie moža zreahavać na žyviołu, jakaja raptam źjaviłasia pierad im u ciomny čas sutak. Dziejny ŭ hetaj zonie znak «Dzikija žyvioły» jość nie zabaranialnym, a papieradžalnym — jon papiaredžvaje ab niebiaśpiecy. Sutyknieńnie z zubram u abodvuch vypadkach nie źjaŭlajecca naŭmysnym, tamu kiroŭcy nie buduć pryciahvacca da administracyjnaj adkaznaści».
U 1996 hodzie ź Biełaviežskaj puščy ŭ SVK «Aziory» Hrodzienskaha rajona zavieźli 18 zubroŭ dla stvareńnia novaj papulacyi. Zubry syšli na ziemli SVK «Prahres-Vierciališki», a ŭ minułym hodzie pačali asvojvać terytoryi susiedniaha Voranaŭskaha rajona. Na žal, šlachi mihracyi hetych žyvioł pačali pierasiakacca z aŭtamabilnymi darohami.
Pieršaje ŭ Biełarusi DTZ z udziełam zubra adbyłosia ŭ studzieni 2018 hadoŭ za dva kiłamietry ad vioski Taboła. I voś — novaje DTZ. Ekołahi prapanujuć na hetym niebiaśpiečnym učastku darohi pastavić dadatkovyja, bolš vysokija mačty sa śviatłodyjodnymi lichtarami i navat z soniečnymi batarejami na adlehłaści 400—500 mietraŭ. Tady zubr budzie dobra bačny, kali jon vyjdzie nočču na darohu. Hetuju ideju całkam padtrymlivajuć i ŭ DAI, pakolki na mnohich avaryjna-niebiaśpiečnych učastkach daroh vobłaści ŭstalavana padobnaje aśviatleńnie, što dało dobry efiekt.
Siońnia, jak padličyli śpiecyjalisty, u Aziorskich lasach žyvie kala 300 zubroŭ. Jany ścisnutyja adviedzienymi terytoryjami i šukajuć novyja, ale ŭ SVK «Aziory» ŭžo niama svabodnych lasnych uhodździaŭ dla arendy. Bolš prymalny sposab vyrašeńnia prablemy — pierasialeńnie zubroŭ.
