U niadzielu, 13 studzienia, na telekanale «Biełsat» startavała novaja humarystyčnaja pieradača «Viečarovy špil», jakuju viadzie Aleś Karnijenka. Pieradača vychodzić na ruskaj movie i adrasavanaja žycharam nie tolki Biełarusi, ale i ŭsiaho SND. Ad hetaha i pieršy žart — abyhryvańnie mytnaha («tamožiennoho») sajuza, jak «tajožnaha».
Ciapier, ułasna, žarty. Kancentravalisia jany ŭ asnoŭnym na biełaruskaj tematycy.
***
«U Minsku nieviadomyja vandały złamali skulpturu «Vialikaja istota». Tak jaje nazvaŭ aŭtar — mastak Bazyl Stachijevič, ale ja liču, što heta byŭ nieaficyjny pomnik dziaržaŭnaj palitycy. Kožny, chto zadavaŭsia pytańniami, dzie svabodnyja vakansii, dzie narmalnyja zarobki, dzie demakratyja, dzie? Kožny moh padyści da hetaha pomnika i atrymać adkaz».
***
«Viedajecie, jak pa-biełarusku hučyć fraza: «Usie savieckija ludzi buduć žyć pry kamuniźmie». Nie? Našmat karaciej. «Usim pa piaćsot».
***
«Tolki ŭ 2017 hodzie amal 52 tysiačy biełarusaŭ atrymali dazvoł na žycharstva ŭ Jeŭrasajuzie. Na «Biełaruśfilmie» čas užo zdymać rymejk filma «Ucioki z Šaŭšenka», tolki nazyvacca jon budzie «Ucioki ad Łukašenki».
***
Była parodyja na razmovu Alaksandra Łukašenki i Uładzimira Pucina.
— Sania, na samba pajedzieš?
— Nie chaču, Vova. Ty mienia i tak uvieś čas, to z naftaj, to z kredytami kidaješ».
***
U rubrycy «Dobryja naviny» na ekranie źjaviŭsia čałaviek u majcy ź dziaržaŭnym hierbam i nadpisam na joj «Mnie nie soramna», jaki jeŭ zakatki na dziaržaŭnym čyrvona-zialonym ściahu. Razmaŭlaŭ jon na trasiancy.
«Pa dadzienych Suśvietnaj arhanizacyi achovy zdaroŭja, Biełaruś pa raśpićci ałkaholnych napojaŭ niečakana skaciłasia z druhoha miesca na dvaccać siomaje. Złyja jazyki kažuć, što heta taki šachier-machier sa statystyčnymi dadzienymi. I heta tolki ja zašyŭsia, a skažu Piatroviču ad Novaha hoda zaviazać, dyk uvohule na piaćdziesiataje miesca vyjdziem».
***
«Kiraŭnik Aparata Akademii navuk zajaviŭ, što nie zhodny z Darvinam, i ličyć, što my ŭtvarylisia ad pryšelcaŭ z kosmasu, ale nie ŭdakładniŭ, chto «my». Mnie zdajecca, što vučony paćvierdziŭ toje, što my i tak viedali: «Čynoŭniki zvalilisia ź miesiaca».
***
«Litoŭskaja kampanija pabudavała ŭ Biełarusi piać bijahazavych elektrastancyj. Jakija, udumajciesia tolki, pracujuć na karaviakach. Heta ž brudny biznes! U adroźnieńnie ad čyściutkaha ŭrana, na jakim budzie pracavać AES u Astraŭcy. Ale samaje strašnaje, što hetyja litoŭskija inviestary mohuć razburyć biełaruskuju ekanamičnuju madel, bo jany robiać hrošy ź dziarma, a ŭ nas pryniata naadvarot».
***
Jašče adna rubryka — heta prahnozy hadałki. Jana začytała ŭ efiry nastupny list:
«Ja žyvu ŭ vioscy na zarobak u 200 rubloŭ, płaču padatki, chadžu na daterminovaje hałasavańnie, usie maje dzieci vymušanyja byli dobraachvotna ŭstupić u BRSM. Tak, ciažka, nie na ŭsio chapaje hrošaj, zatoje niama vajny, a jašče ja časta zakładvaju za kaŭnier i tady zabyvaju, dzie ja žyvu. Padkažycie, dzie moj dom?»
Adkaz: «Baču, što tvaja chata z kraju».
***
«U 2018 hodzie sam Dyjeha Maradona spačatku pahadziŭsia na pasadu dyrektara bresckaha «Dynama», a potym hetaje «Dynama» pradynamiŭ. Dyjeha Maradona ŭmieŭ dobra hulać nie tolki nahami, ale i rukami, a tut narešcie vykarystaŭ i hałavu».
