11 studzienia ŭ nacyjanalnym vystavačnym centry «BiełEkspa» Alaksandr Łukašenka pravioŭ tradycyjny pryjom na stary Novy hod. Siarod zaprošanych byli ministry, artysty, spartsmieny, biznesmieny, piša Tut.by
Tut vystupali Stas Michajłaŭ, Mikałaj Baskaŭ, Taisija Pavalij i Tamara Hvierdcyteli, Alaksandr Saładucha, Ina Afanaśjeva, Iskui Abalan-Baroŭskaja, Viktoryja Aleška, Alona Łanskaja, Anastasija Cichanovič, hrupa «Ciahni-Šturchaj».
Alaksandr Saładucha byŭ zaprošany na pryjom čaćviorty raz. Jon raspavioŭ, što Stas Michajłaŭ vykanaŭ na pryjomie dziesiać piesień, stolki ž praśpiavaŭ i Mikałaj Baskaŭ.
— Heta było zvyšśviata! — skazaŭ Alaksandr Saładucha.
Iskui Abalan-Baroŭskaj na mierapryjemstvie ŭručyli hanarovaje zvańnie zasłužanaj artystki Biełarusi.
Akramia svaich piesień «Inšaje žyćcio» i «Novy dzień», śpiavačka razam z Alonaj Łanskoj i Nastaśsiaj Cichanovič vykanała kampazicyju ź filma «Dziaŭčaty».
Himnastka Luboŭ Čarkašyna raspaviała, što siarod spartsmienaŭ na mierapryjemstvie byli bijatłanistka Darja Domračava, bajdaračnicy Volha Chudzienka, Maryna Litvinčuk, Marharyta Machnieva. Himnastcy Kaciarynie Hałkinaj Łukašenka prysvoiŭ zvańnie «Zasłužany majstar sportu Respubliki Biełaruś».
Śpiavak, kampazitar, šoŭmen i televiadučy Hierman Citoŭ u svaim Instagram navat zapościŭ nievialikaje videa z vystupleńnia Stasa Michajłava.
Siarod biznesmienaŭ na pryjomie byŭ rasijski miljarder Michaił Huceryjeŭ. Letaś, nahadajem, pres-sakratarka prezidenta Natalla Ejsmant raspaviała «Narodnaj Voli», što rasijski biznesmien pryjazdžaŭ na mierapryjemstva nie adzin, a «razam sa svaimi siabrami — viadomymi artystami». Tady na pryjomie vystupali Leps, Nataša Karaleva, Mikałaj Baskaŭ, Taisija Pavalij.
U intervju sam miljarder nie ŭtojvaŭ, što zaprasiŭ u Biełaruś niekatorych viadomych vykanaŭcaŭ:
— Ich treba zahadzia zaprašać, tamu što na stary Novy hod jany albo na Maldyvach, albo ŭ Sočy katajucca na łyžach. Adnamu patelefanavaŭ- - kaža, nie mahu. Nabraŭ Baskava: «Kola, treba vystupić na kancercie». Ja dla jaho 5-6 piesień napisaŭ prosta tak, biaspłatna, jak aŭtar vieršaŭ. Jon tolki spytaŭ, kali kancert. «Dobra, jość». Ja mnohim artystam pišu pieśni. My ź imi siabrujem, majem znosiny. Kali kamu-niebudź niešta treba, to dapamahajem adzin adnamu. Chutka budzie moj dzień naradžeńnia. Jany taksama buduć vystupać. Ja tolki zaiknuŭsia pra toje, kab zapłacić hanarar. Jany ledźvie nie pakryŭdzilisia: «Ty što nas abražaješ? Nie kryŭdzi nas». Kali vy zaprosicie mianie na svoj dzień naradžeńnia, to ja ŭ jakaści padarunka paprašu artystaŭ — i jany buduć śpiavać biaspłatna. Dla hetaha nie treba hrošaj.
