Nabližany da prezidenta Rasii aliharch Jaŭhien Pryhožyn (jakoha nazyvajuć kucharam Pucina) ździajśniaje rehularnyja pajezdki ŭ Afryku i Blizki Uschod, dzie Maskva imkniecca ŭmacavać svaju prysutnaść, havorycca ŭ rasśledavańni Novaj haziety.
Pryhožyn dla svaich kamandzirovak vykarystoŭvaje pryvatny samalot Raytheon Hawker 800XP z bartavym numaram M-VITO. Heta stała viadoma paśla taho, jak dačka Jaŭhienija Pryhožyna — Palina — apublikavała fatahrafii samalota ŭ svaim instahramie
Dziakujučy servisam nazirańnia za samalotami, žurnalisty Novaj haziety daviedalisia, što ŭ pieryjad sa śniežnia 2016 pa studzień 2019 samalot kuchara Pucina čaściej za ŭsio spyniaŭsia ŭ Sankt-Pieciarburhu i Maskvie. Dalej iduć Blizki Uschod i Afryka. U niekatorych vypadkach samalot, pa ŭsioj vierahodnaści, lacieŭ z vyklučanym transpondaram.
Novaja hazieta padličyła, što samalot Pryhožyna 21 raz pabyvaŭ nad terytoryjaj Siryi, niahledziačy na pahrozu rakietnych udaraŭ, a taksama 27 razoŭ — nad Jehiptam, pobač ź Livijaj ci nad joj. Pavodle kienijskich ŚMI, jon taksama byvaŭ u Sudanie i Čadzie.
Pavodle žurnalistaŭ, vizity Pryhožyna źviazany ź intaresami Rasii ŭ Afrycy i Siryi, jakija ŭ tym liku zabiaśpiečvajuć struktury Pryhožyna.
