Stała viadoma pra jašče adnaho mihranta, jaki skončyŭ žyćcio samahubstam, z-za pierśpiektyvy vysyłki ź Biełarusi: u śniežni minułaha hoda ŭ Łojevie 35-hadovy Siarhiej Barysaŭ ździejśniŭ suicyd paśla taho, jak atrymaŭ pastanovu ab vysyłcy na 4 hady. Pra heta TUT.BY raspaviali svajaki mužčyny.

Siarhiej byŭ hramadzianinam Rasii, ale 17 apošnich hadoŭ jon žyŭ u Biełarusi, dy i naradziŭsia taksama tut. U Homieli ŭ jaho jość kvatera, ale ŭ apošnija hady mužčyna pierabraŭsia ŭ Łojeŭ — bližej da mamy-piensijanierki i brata-invalida.

14 śniežnia 2018 hoda adździeł pa hramadzianstvie i mihracyi Łojeŭskaha RAUS «u intaresach hramadskaha paradku» pryniaŭ rašeńnie vysłać mužčynu ź Biełarusi. U pastanovie staršy inśpiektar hrupy pa hramadzianstvie i mihracyi Łojeŭskaha RAUS adznačyła, što za hod u Siarhieja zafiksavana dva administracyjnyja pravaparušeńni: źjaŭleńnie ŭ hramadskim miescy ŭ pjanym vyhladzie i i drobny kradziež. Paličyła i inšyja «administratyŭki» mužčyny za ŭvieś čas jaho pražyvańnia ŭ Biełarusi — usiaho za 10 hadoŭ takich nabrałasia vosiem (u asnoŭnym — źjaŭleńnie ŭ niećviarozym vyhladzie ŭ hramadskim miescy).

U vyniku dazvoł na pastajannaje pražyvańnie byŭ anulavany — i da 28 śniežnia Siarhiej pavinien byŭ dobraachvotna, za svoj košt pakinuć Biełaruś.

Siabroŭka siamji Śviatłana, pa adukacyi juryst, dapamahła mužčynu skłaści skarhu na pastanovu ab vysyłcy na imia načalnika UUS Homielskaha abłvykankama. Ale adpravić jaje tak i nie paśpieli.

— 19 śniežnia my pavinny byli ŭ 10 hadzin iści da nataryusa, — uspaminaje mama Siarhieja — Ludmiła Vasiljeŭna. — Kala dzieviaci stelefanavalisia, damovilisia. U 9.50 telefanuju, kab vychodziŭ — nie biare słuchaŭku. Padyšła da jaho doma — znoŭ telefanuju, nie biare. Da kvatery — telefanuju, čuju, što telefon jaho ŭnutry zvonić, ale Siaroža nie padymaje. Susiedka jašče supakojvała: kaža, maŭlaŭ, nie chvalujsia, Luda, moža vyjšaŭ kudy, a telefon zabyŭsia. Ale na jaho heta było nie padobna, — žančyna, uspaminajučy toj dzień, płača.

Praź dźvie hadziny čakańniaŭ vyrašyli ŭzłamać dźviery. Siarhiej lažaŭ kala vannaj. Jak vyśvietlicca paźniej — ćviarozy. Pobač — zapiska. Potym rodnyja adšukali jašče niekalki zapisak padobnaha źmiestu: adna adrasavana mamie, inšaja — chrosnaj, jašče adna — kryk dušy, čaćviortaja — milicyi (jaje my nie publikujem pa etyčnych mierkavańniach).

— My moŭčki pieranosili hora. A tut na vočy trapiŭsia artykuł tut.by pra hetych dvuch mužčyn. I my zrazumieli, što, akazvajecca, nie adny takija. Atrymlivajecca, heta ŭžo tendencyja. U našych pravaachoŭnych orhanaŭ punkcik jość pa departacyi? Nie viedaju, što imi ruchaje, kali jany prymajuć hetyja rašeńni, — kaža Śviatłana.

— Mnie naša inśpiektar, jašče kali hetu pastanovu rychtavała, skazała, što z-za majho syna jaje pazbavili premii, što svoječasova nie vysłała jaho. Nu voś — vysłała. Atrymała jana ciapier premiju? Ja nie razumieju, kamu jon pieraškadžaŭ, — znoŭ płača mama zahinułaha.

Rašeńnie pra vysyłku Siarhieja žančyny ličać niezakonnym — kožnaja pa-svojmu: mama — bo mama, Śviatłana — bo juryst.

— Vysyłka prymianiajecca da zamiežnika ŭ vyklučnych vypadkach, kali z ulikam asoby zamiežnika možna zrabić adnaznačnuju vysnovu, što prymianieńnie inšych vidaŭ abmiežavańniaŭ nie harantuje biaśpieku dziaržaŭnym intaresam abo intaresam nasielnictva. Anulavańnie dazvołu na pastajannaje pražyvańnie źjaŭlajecca pravam, a nie abaviazkam dziaržaŭnaha orhana, jaki prymaje rašeńnie. Heta aznačaje, što navat u vypadku pryciahnieńnia zamiežnika na praciahu adnaho kalandarnaha hoda da administracyjnaj adkaznaści piać i bolš razoŭ pry pryniaćci rašeńnia ab anulavańni dazvołu na žycharstva uličvajucca i aceńvajucca ŭsie abstaviny suviazi hramadzianina z Respublikaj Biełaruś. Pry razhladzie pytańnia pra vysyłku Siarhieja nie byli ŭličanyja takija važnyja momanty, što jon, da prykładu, maje va ŭłasnaści kvateru ŭ Homieli, u jakoj jon pražyvaŭ jašče niadaŭna, spraŭna apłačvajučy kamunalnyja płaciažy, nie maje za miežami Biełarusi žylla i pracy, a jaho maci i brat pa stanie ŭzrostu i zdaroŭja patrabujuć uvahi i dohladu, — pieraličvaje arhumienty Śviatłana.

Siarhiej (sprava) z maci i bratam

Siarhiej (sprava) z maci i bratam

… Na dniach Ludmile Vasiljeŭnie pa pošcie sa Śledčaha kamiteta pryjšoŭ list. U im paviedamlajecca, što 30 studzienia pa fakcie śmierci jaje syna adnoŭlenaja daśledčaja pravierka.

Nahadajem, 15 studzienia hetaha hoda ŭ vioscy Niehaŭka Buda-Kašaloŭskaha rajona pajšoŭ z žyćcia Vital Kuźmiankoŭ. Uradženiec Rasii 14 apošnich hadoŭ pražyvaŭ u Biełarusi. Tut u jaho byŭ dom, žonka Volha i šeść dačok. Niezadoŭha da navahodnich śviataŭ mužčyna trapiŭsia vypiŭšym prosta na pracy. Jaho zvolnili, i paśla hetaha Buda-Kašaloŭski RAUS anulavaŭ dazvoł na pastajannaje pražyvańnie ŭ Biełarusi. Mužčynu chacieli vysłać. Ale nie paśpieli.

U najbližejšyja dni vyrašycca los i jašče adnaho mihranta - ŭkrainca Siarhieja Pracenki. Adździeł pa hramadzianstvie i mihracyi Buda-Kašaloŭskaha RAUS, a zatym i rajonny sud pryniali rašeńnie vysłać jaho ź Biełarusi za toje, što toj niejak źjaviŭsia vypiŭšym na vulicy. Ale jechać mužčynu niama kudy, a pakinuć tut žonku ŭ dekrecie i biez dachodu z tryma maleńkimi dziećmi niama na kaho. Za svaju siamju Siarhiej vyrašyŭ zmahacca - padaŭ skarhu ŭ sud vyšejšaj instancyi. 7 lutaha sudovaja kalehija abłasnoha suda vyniesie rašeńnie pa hetaj spravie.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?