Alaksandr Łukašenka 26 sakavika niečakana adpraviŭ u adstaŭku staršyniu Mahiloŭskaha abłvykankama Uładzimira Damanieŭskaha. Vykonvać abaviazki kiraŭnika vobłaści budzie Mikałaj Karocin, jaki da hetaha źjaŭlaŭsia pieršym namieśnikam Damanieŭskaha. Chto jon taki?
Mikałaj Karocin. Fota ok.ru.
Mikałaju Karocinu 54 hady, jon rodam ź vioski Alefina Staradubskaha rajona Branskaj vobłaści Rasii. Kaliści hetaja terytoryja była ŭschodniaj miažoj Rečy Paspalitaj. U škołu Karocin chadziŭ u vioscy Bobryk (heta ŭžo Paharski rajon) Branščyny. Usio heta prylehłyja da Biełarusi terytoryi.
«Baćki pracavali ŭ kałhasie. Baćka zahadvaŭ fiermaj, maci pracavała cialatnicaj i dajarkaj. Ja ź dziacinstva pryvučany da pracy na ziamli. Užo z 12 hadoŭ araŭ, kasiŭ, siejaŭ. Navat ciapier mahu zaprehčy kania. Ziamlu vielmi lublu», — kazaŭ jon u adnym intervju.
Vučycca Karocin pajšoŭ u Navazybkaŭski sielskahaspadarčy technikum. U čas vučoby adsłužyŭ u savieckim vojsku. Naprykancy isnavańnia SSSR pajechaŭ vučycca ŭ Horackuju sielskahaspadarčuju akademiju, atrymaŭ adukacyju pa śpiecyjalnaści — «ekanomika i arhanizacyja sielskaj haspadarki».
Paśla hetaha Karocin užo nie viartaŭsia ŭ Rasiju. Jon zastaŭsia ŭ Horkach u jakaści vykładčyka, tam ža naradziŭsia syn, jakoha, jak i baćku, i dzieda, nazvali Mikałajem. U 2000-m Karocina zabrali ŭ abłasny centr, tam jon staŭ pracavać u «Mahiloŭabłmajomaści».
Kaža, što padčas pracy ŭ fondzie dziaržaŭnaj majomaści abjeździŭ usiu vobłaść. Sutykaŭsia z prablemami ludziej, asabliva ŭ małych haradach.
U 2007 hodzie Karocin staŭ staršynioj Bychaŭskaha rajvykankama. Cikava, što ŭžo praz dva miesiacy paśla pryznačeńnia ŭ Bychaŭ pryjechaŭ Alaksandr Łukašenka. U hutarcy z žurnalistami Karocin raskazvaŭ, što pa pryjeździe ŭ Bychaŭ jaho ŭraziła, što ŭ rajcentry nie było «pryhožych, čystych damoŭ». «Było ŭražańnie, što ludzi žyvuć tut niby časova», — kazaŭ jon.
Bychaŭski rajon siarod tych u krainie, što najbolš paciarpieŭ ad avaryi na Čarnobylskaj AES. Dziaržava ŭkładvaje niamała hrošaj u raźvićcio hetaha rehijona. Nie dziva, što paśla Karocin u Mahiloŭskim abłvykankamie ŭznačaliŭ adździeł pa prablemach likvidacyi nastupstvaŭ katastrofy na ČAES.
Apošnija piać hadoŭ Karocin uznačalvaŭ instytut «Mahiloŭhipraziem». Heta takaja ŭstanova, jakaja pravodzić pracy pa ziemleŭparadkvańni i zajmajecca raźmierkavańniem ziemlaŭ miž ułaśnikami i arandatarami.
U listapadzie 2018 Mikałaj Karocin byŭ pryznačany pieršym namieśnikam staršyni abłvykankama. Atrymlivajecca, što na hetaj pracy jon nie adbyŭ i paŭhoda, jak pajšoŭ i na pavyšeńnie, chaj, mahčyma, i časovaje.
Mikałaj Karocin zarehistravany ŭ sacyjalnaj sietcy «Adnakłaśniki». Bolšaść siabroŭ čynoŭnika tam z Branskaj vobłaści. Sam jon padpisany na try supołki: «Samyja zabojnyja aniekdoty», «Dzień za dniom» i «Piarliny dumki».
Sam Karocin łajknuŭ tolki adzin dopis z «Branskich navin»: «Šukaju ŭkrainskuju fotamadel dla načnych prahułak pa centry Maskvy z A.B.Čubajsam. Apłata pa vyniku prahułak». Vidavočnaja aluzija na historyju z zabojstvam adnaho ź lidaraŭ rasijskaj apazicyi Barysa Niamcova.
U Mikałaja Karocina dvoje synoŭ — Mikałaj i Illa. Pieršy vučyŭsia ŭ Mahiloŭskim univiersitecie charčavańnia. Kali vieryć jahonaj staroncy ŭ fejsbuku, to skončyć VNU jon nie zmoh u čas. Miescam pracy chłopca paznačana krama «5 elemient» (pradaŭcom). Mahčyma, ciapier jon užo źmianiŭ pracu. Jahonaja žonka Hanna skončyła Miedycynski ŭniviersitet i ciapier pracuje ŭ adździaleńni ankałohii Mahiloŭskaj abłasnoj balnicy.
Małodšy syn — Illa — student u Biełaruska-rasijskim univiersitecie ŭ Mahilovie, jamu 19 hadoŭ.
