Pavodle infarmacyi TUT.BY, Alaksandr Dziadźko byŭ zatrymany 15 traŭnia. Fota: bsaer.org
— Na pracy niama, — kažuć supracoŭniki Minskaha navukova-praktyčnaha centra chirurhii, transpłantałohii i hiematałohii (byłoj 9-j haradskoj kliničnaj balnicy Minska).
U piatnicu ranicaj kabiniet hałoŭnaha pazaštatnaha aniestezijołaha-reanimatołaha, doktara miedycynskich navuk Alaksandra Dziadźko začynieny. Jaho kalehi nie viedajuć, što zdaryłasia.
— Nam nichto nie paviedamlaje, dzie jon. U minułym hodzie, kali zatrymali Saŭčanku i Kušniarenku, my tolki praz tydzień usio daviedalisia, tak što prychodźcie paźniej, — kažuć TUT.BY kalehi Alaksandra Dziadźko.
Pra toje, što siłaviki prajavili cikavaść da viadomaha aniestezijołaha krainy Alaksandru Dziadźko, paviedamili infarmavanyja krynicy:
— Pa papiaredniaj infarmacyi, Alaksandra Michajłaviča zatrymali ŭ ramkach «spravy miedykaŭ», pakazańni suprać jaho daŭ adzin z pastaŭščykoŭ miedycynskaha abstalavańnia.
«Alaksandra Michajłaviča vyklikali na razmovu, i ŭžo nie vypuścili. Jak my razumiejem, jon zatrymany, — raspaviali «Narodnaj Voli» blizkija siamji ludzi. — My ŭ šoku. Alaksandr Dziadźko bieź pierabolšańnia — załaty fond biełaruskaj miedycyny. Prafiesijanał svajoj spravy, razumny i intelihientny čałaviek…»
Alaksandr Michajłavič u miedycynie 36 hadoŭ, u 1998 hodzie jon staŭ zahadčykam adździaleńnia aniestezijałohii 9-j haradskoj balnicy. Viasnoj 2008 hoda Dziadźko razam z kalehami vykanali pieršuju apieracyju pa pierasadcy piečani. Jon łaŭreat Dziaržaŭnaj premijaj za raspracoŭku i ŭkaranieńnie technałohij transpłantacyi orhanaŭ u dziaciej i darosłych.
Za apošni hod u 9-m špitali heta ŭžo nie pieršaje zatrymańnie. Uletku 2018 hoda kajdanki nadzieli na hałoŭnaha lekara Valeryja Kušniarenku i zahadčyka endaskapičnym adździaleńniem Andreja Saŭčanku, jakoha i pacyjenty, i sami lekary nazyvajuć «unikalnym». U lutym 2019 hoda sudom Frunzienskaha rajona Minska Andrej Saŭčanka byŭ pryznany vinavatym u atrymańni chabaru ŭ try tysiačy rubloŭ i prysudžany da 2,5 hoda pazbaŭleńnia voli ŭ kałonii va ŭmovach ŭzmocnienaha režymu. A zaraz u Maskoŭskim sudzie słuchajecca sprava ŭ dačynieńni da byłoha hałoŭnaha doktara Valeryja Kušniarenki. Jon pryznaŭ vinu ŭ atrymańni 13 800 u jakaści chabaru.
U KDB raspaviali, što nie zatrymlivali hałoŭnaha aniestezijołaha Alaksandra Dziadźko, u Śledčym kamitecie paabiacali dać infarmacyju krychu paźniej.
