Z 13 pa 21 lipienia na bazie haściničnaha kompleksu «Ałmaz» u Minsku prachodzić prajekt YOU CAN — adukacyjny IT-łahier dla dziaciej-sirot z usioj krainy. 70 junych biełarusaŭ va ŭzroście ad 13 da 16 hadoŭ pryjechali ŭ stalicu, kab atrymać bazavyja viedy ŭ prahramavańni i sumiežnych navukach. Vykładčyki abiacajuć, što da kanca źmieny ŭdzielniki IT-łahiera raspracujuć prajekty mabilnych dadatkaŭ i sajtaŭ, jakija buduć vyrašać asnoŭnyja zadačy metaŭ ustojlivaha raźvićcia AAN.

Piłotnaja viersija prajekta YOU CAN prajšła ŭ minułym hodzie ŭ Bresckaj vobłaści. U 2019 jaho stvaralniki vyrašyli nie spyniacca i pravieści IT-łahier u 2-i raz. Dziakujučy infarmacyjnaj padtrymcy Ministerstva adukacyi Respubliki Biełaruś, testavaje zadańnie na vyjaŭleńnie samych zamatyvavanych dziaciej było raspaŭsiudžana pa ŭsich śpiecyjalizavanych ustanovach. Tamu ŭdzielnikami 2 siezonu stali chłopcy i dziaŭčaty z usich abłaściej našaj krainy. 

Vielmi časta dzieci-siroty ličać, što ich budučynia vyznačana tolki kaledžami abo prafiesijami, jakija nie patrabujuć nijakaj adukacyi. Pryčynaj hetamu moža być i składanaja žyćciovaja situacyja, u jakoj jany apynulisia, i asiarodździe, u jakim jany rastuć, — raskazvaje Kaciaryna Bryl, kiraŭnik prajekta YOU CAN. — Našym łahieram my chočam nie tolki paznajomić dziaciej sa śfieraj IT, ale i pierakanać kožnaje dzicia, što ŭ hetym śviecie možna dasiahnuć lubych metaŭ i realizavać siabie ŭ luboj prafiesii. A hałoŭnaje, što dla hetaha nieabchodna, — heta pavieryć u maru i skazać sabie: «Ty možaš!».

U ramkach 9-dzionnaj vučebnaj prahramy junyja biełarusy paznajomiacca z prahramavańniem, veb-markietynham i veb-dyzajnam, internet-žurnalistykaj, SEO, SMM i biznes-płanavańniem ŭ śfiery IT. Vykładčyki prajektu adznačajuć, što za taki karotki termin paŭnavartasna navučyć dziaciej składanym «univiersiteckim» dyscyplinam niemahčyma. Tamu asnoŭnaja zadača kursa — achapić usie aktualnyja kirunki IT-śfiery i dać dzieciam ahulnaje razumieńnie kožnaj ź ich. Kab hety praces byŭ efiektyŭnym, u łahiery pracuje psichołah-prafaryjentołah. Jon dapamahaje vyznačyć najbolš udały kirunak dla kožnaha dziciaci ŭ adpaviednaści ź jaho intaresami i zdolnaściami.

Ale na zaniatkach u navučalnych kłasach prahrama łahiera nie skančajecca. Kožny dzień u hości da chłopcaŭ buduć prychodzić dyrektary i kiraŭniki adździełaŭ bujnych biełaruskich kampanij. Akramia hetaha, dla dziaciej praduhledžany ekskursii ŭ ofisy raspracoŭščykaŭ kampjutarnych hulniaŭ i śpiecyjalistaŭ u internet-kamunikacyi. U volny čas udzielniki prajekta zmohuć razam z šef-kucharam navučycca hatavać sušy abo sabrać kanstruktar pamieram z čałaviečy rost, zatym pasprabavać siabie ŭ roli vizažysta abo adpravicca ŭ džyp-tur pa biezdaražy.

Kamanda arhanizataraŭ prajekta YOU CAN płanuje viarnucca z trecim siezonam užo na zimovych vakacyjach. U płanach na budučyniu — budaŭnictva ŭłasnaha adukacyjnaha kampusa, dzie navučać dziaciej prahramavańniu možna budzie kruhły hod.

2 siezon prajekta YOU CAN realizavany sumiesna ź biełaruskim adukacyjnym centram «Adukar» pry padtrymcy sietki aŭtazapravačnych stancyj A-100, videaservisu VOKA, kampanij NIKO Firm, MTS i Konstryktor.org.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?