Na scenie fiestyvalu «Rok za Babroŭ», jaki adbyŭsia 3 žniŭnia na aeradromie Baravaja pad Minskam, viadučy, viadomy rasijski žurnalist Juryj Dudź, uzhadaŭ subotniuju akcyju pratestu ŭ Maskvie «Za svabodnyja vybary». Jon nazvaŭ pratesty «važnym varušniakom». Publika sustreła vykazvańni Dudzia vopleskami.
Dudź asudziŭ muzykaŭ, jakija bajacca adkryta zajaŭlać pra svaju hramadzianskuju pazicyju ŭ važnyja dla krainy časy.
«Ja prylacieŭ učora z horada Maskva. Horada, u jakim prosta zaraz, prosta ŭ hetyja chviliny adbyvajecca vielmi važnaja i davoli stromnaja dźvižucha. Tak vyjšła, što kali takaja dźvižucha ŭ našaj krainie pačynajecca, artysty, u tym liku rok-artysty, jany dzielacca na dźvie hrupy, na dźvie katehoryi. Pieršaja katehoryja chavaje svoj jazyk pamiž bułkami, bajučysia zhubić kavałačak chleba, bajučysia razzłavać niekaha naviersie. Nu i ŭvohule pavodzić siabie «tak sabie». A druhaja katehoryja, jana, naturalna, minimalnaja, jana nievialikaja. Heta artysty, jakija praciahvajuć nazyvać rečy svaimi imionami, i ŭ tvorčaści, i nie ŭ tvorčaści, samymi roznymi sposabami, dasiažnymi im», — skazaŭ Dudź.
Adzin z hurtoŭ, jaki «nie bajaŭsia i nie baicca», na dumku Dudzia, heta «P***filmy».
«Heta hurt, jaki pamiataje, dla čaho isnuje rok-muzyka. Rok-muzyka isnuje dla taho, kab nahadvać ludziam pra ideały, a dziaržavie — pra abaviazalnictvy», — tak žurnalist anansavaŭ vychad muzykaŭ na scenu.
Salist hurtu «P***filmy» taksama sa sceny vykazaŭ niezadavolenaść tym, u jakim kirunku idzie Rasija, i salidaryzavaŭsia z manifiestantami.
Na fiestyval «Rok za babroŭ» na starym aeradromie pad Minskam sabralisia dziasiatki tysiač hledačoŭ. Siarod inšych, tam vystupili taksama «Lapis-98» i «Basta».
Čytajcie taksama: U centry Maskvy prajšła akcyja «Za svabodnyja vybary», zatrymana 828 čałaviek
