Druhaja sproba francuza Franki Zapaty pierasiekčy praliŭ Ła-Manš na došcy dla latańnia stała paśpiachovaj.
Jaho pavietranaje padarožža pačałosia ŭ 08:15 (09:15 pa minskim časie) i doŭžyłasia kala 20 chvilin, jon pieraadoleŭ na pavietranaj došcy kala 35 kiłamietraŭ. Zapata startavaŭ niedaloka ad francuzskaj kamuny Sanhat i paśpiachova skončyŭ palot pablizu horada Sent-Marharet Bej u Vialikabrytanii.
Pa słovach Zapaty, jon lacieŭ z chutkaściu 160-170 kiłamietraŭ za hadzinu.
«U kancy, kali mnie było baluča, ja skazaŭ sabie: «Spynisia, ty nie maješ prava na bol. Atrymlivaj asałodu». Ja bačyŭ uźbiarežža Vialikabrytanii», — raspavioŭ žurnalistam Zapata, dadaŭšy, što «jamu vielmi pašancavała» ažyćciavić taki palot i mieć takuju kamandu, jak u jaho. Palot Zapaty ŭ žyvym efiry tranślavaŭ telekanał BFM TV.
Francuz padzialiŭsia, što paśla niekalkich tydniaŭ napružanaj pracy adčuvaje siabie stomlenym i «maje patrebu ŭ adpačynku». Nie chavajučy emocyj, jon padziakavaŭ svajoj kamandzie, žoncy i siabram za padtrymku. Razmaŭlajučy z synam pa telefonie paśla palotu, Zapata nie zmoh strymać śloz. «Ty najlepšy tata», — pačuŭ jon u trubku.
Havoračy pra budučyja zadačy, Zapata adznačyŭ, što źbirajecca dapracavać svaju «mašynu dla latańnia».
Eks-čempijon śvietu pa hidracykle, Zapata raspracavaŭ latalnuju došku ŭ svajoj majsterni pad Marselem. Jaho vynachodki karystalisia popytam siarod abyvacielaŭ, a potym francuzskaja žandarmieryja prapanavała supracoŭnictva.
Šyrokuju viadomaść Zapata zdabyŭ paśla vajskovaha parada 14 lipienia 2019 hoda na Jelisiejskich Palach z nahody Dnia ŭziaćcia Bastylii. Tady jon pralacieŭ na svajoj došcy nad płoščaj Zhody, uraziŭšy hledačoŭ i vysokich haściej śviata.
Upieršyniu pierasiekčy Ła-Manš na latalnaj došcy Zapata pasprabavaŭ 25 lipienia. Adnak tady jon nie zmoh damahčysia mety i ŭpaŭ u vadu na siaredzinie palotu. Latajučy aparat Zapaty, jaki pracuje na hazie, abstalavany piaćciu turbareaktyŭnymi mini-ruchavikami, jakija dazvalajuć raźvivać chutkaść da 190 kiłamietraŭ za hadzinu.
Zapata byŭ natchniony pieršym pieralotam praz Ła-Manš, jaki ažyćciaviŭ francuzski piłot Łui Blerya 110 hadoŭ tamu — 25 lipienia 1909 hoda.
