Lidzija Jarmošyna vystupaje za vybary ŭ parłamient pa partyjnych śpisach. Pra heta jana raspaviała ŭ prahramie «Kontury» na telekanale ANT, paviedamlaje BIEŁTA.
«Ja naohuł za. Liču, što kali ŭvieś śviet idzie pa šlachu pradastaŭleńnia asablivych prefierencyj palityčnym partyjam, my nie možam być tut samymi razumnymi i iścinaj u apošniaj instancyi», — skazała jana.
Havoračy pra hatoŭnaść palityčnych partyj da ŭviadzieńnia praparcyjnaj sistemy, staršynia CVK adznačyła, što jany nikoli nie buduć da hetaha hatovyja, kali ŭ ich nie źjavicca mahčymaść atrymać miesca ŭ parłamiencie.
«U partyi nie ŭstupajuć, ich šerahi tajuć, a kali tam vielmi maleńkaje siabroŭstva, to tam niama adboru intelektualnaha, adboru najlepšych — tych, chto ŭvojdzie ŭ parłamient, — dadała Lidzija Jarmošyna. — Tolki pierachodziačy ŭ elitu, partyi zmohuć naraścić kolkaść siabraŭ i atrymać cikavych i hodnych palitykaŭ».
«Liču, što my piarojdziem (da vybaraŭ u parłamient pa partyjnych śpisach) kali-niebudź, praŭda nie viedaju, kali. Heta palityčnaja vola, pierš za ŭsio zakanadaŭcaŭ, — kanstatavała staršynia Centrvybarkama. — Źnizu heta nikoli nie pojdzie».
Pavodle jaje słoŭ, vybarščyk nie vitaje padobnuju sistemu, a addaje pieravahu mieć spravu z kankretnym čałaviekam, z deputatam, da jakoha možna pryjści sa svaimi biedami i prablemami, a nie ź niejkaj abiaźličanaj palityčnaj masaj, jakaja nazyvajecca partyjaj.
«Tamu albo dziaržava ŭ asobie zakanadaŭca idzie na hetuju ryzyku śviadoma, vyvučajučy mižnarodny dośvied i staviačy pierad saboj pierśpiektyvu raźvićcia palityčnych partyj, albo pakidaje ŭsio, jak jość, jak hetaha žadaje vybarščyk», — reziumavała Lidzija Jarmošyna.
Adkazvajučy na pytańnie, kali pačniecca vybarčaja kampanija ŭ parłamient, staršynia CVK prainfarmavała, što pakul u prajekty dakumientaŭ uvajšli daty vybaraŭ u Saviet Respubliki — 7 listapada, u Pałatu pradstaŭnikoŭ — 17 listapada. Na 6 žniŭnia pryznačana pasiadžeńnie Centralnaj vybarčaj kamisii, jakaja budzie zaćviardžać kalandarny płan mierapryjemstvaŭ.
«Što tyčycca kanstytucyjnych źmienaŭ, to naŭrad ci jany čakajucca, tamu što ni ŭ centralnaj kamisii, ni ŭ dačynieńni da inšych dziaržaŭnych orhanaŭ, ja nie bačyła, kab isnavali niejkija sfarmulavanyja prapanovy, jakija lahli b u asnovu kanstytucyjnych pieraŭtvareńniaŭ», — adznačyła jana.
Na dumku Lidzii Jarmošynaj, tym, chto spryjaje vyłučeńniu kandydataŭ, hramadzkim abjadnańniam, uładam, treba rabić pryjarytetnym vyłučeńnie ŭ parłamient deputataŭ miascovych savietaŭ.
«Uvieś śviet idzie pa takim šlachu: spačatku pracuješ na nizavym uzroŭni, potym prachodziš u parłamient. Dumaju, što ludzi, jakija papracavali na miascovym uzroŭni, a na abłasnym, minskim haradskim — heta ŭžo hatovyja deputaty parłamienta», — dadała staršynia CVK.
