2 žniŭnia na marskim uźbiarežžy ŭ Šviecyi zabity Piatro Płaks — syn biełaruskaha žurnalista i litaratara Dźmitryja Płaksa. Pra heta paviedamlaje «Radyjo Svaboda». Chłopcu było 16 hadoŭ.
Jak piša šviedskaje vydańnie Expressen, padletak zabiŭ Piatra siakieraj na plažy ŭ kamunie Salentuna na poŭnač ad Stakholma. Paśla hetaha jon sam patelefanavaŭ u palicyju i pryznaŭsia ŭ złačynstvie.
Ź ciažkimi paškodžańniami hałavy paciarpieły viertalotam chutkaj dapamohi byŭ dastaŭleny ŭ lakarniu, adnak uratavać jaho nie ŭdałosia.
«Jon spačatku maryŭ stać pijanistam-kancertmajstram, ale potym skazaŭ, što budzie rabić karjeru evalucyjnaha psichołaha. Pry hetym nikoli nie pakidaŭ fartepijana, praciahvaŭ ihrać i brać uroki. — Piatro byŭ supiertalenavity: čytaŭ navukovyja knihi, jamu ŭsio było cikava… Najlepšy chłopiec na śviecie — zaŭsiody ščaślivy i z dobrym nastrojem», — raskazaŭ šviedskim ŚMI Dźmitry Płaks.
Niezadoŭha da trahiedyi Piotr z mamaj Volhaj 10 dzion praviali ŭ Miensku. Małady čałaviek sustrakaŭsia ź siabrami i svajakami, dzialiŭsia ambitnymi płanami.
4 žniŭnia ŭ škole, dzie vučyŭsia Piatro Płaks, adbyłasia miemaryjalnaja viečaryna jaho pamiaci.
Dźmitry Płaks — piśmieńnik, pierakładčyk, žurnalist. Naradziŭsia ŭ Miensku. Z žonkaj Volhaj pierajechali ŭ Stakholm, dzie Dźmitry zasnavaŭ biełaruskuju słužbu «Radyjo Šviecyja». Siabar Sajuza piśmieńnikaŭ Šviecyi i Sajuza biełaruskich piśmieńnikaŭ.
