Asiarodak zachvorvańnia sibirskaj jazvaj likvidavany, vypadak byŭ adzinkavym, paviedamiŭ karespandentu BiełTA namieśnik ministra sielskaj haspadarki i charčavańnia — dyrektar Departamienta vieterynarnaha i charčovaha nahladu Minsielhasa Ivan Śmilhiń.
«Ustanoŭleny adzinkavy vypadak sibirskaj jazvy ŭ kania ŭ pryvatnym siektary ŭ vioscy Chotamiel Stolinskaha rajona. Užo praviedzieny mierapryjemstvy pa likvidacyi asiarodka, zaraz pravodzicca prafiłaktyka: dezinfiekcyja, vakcynacyja pahałoŭja (bujnaja rahataja žyvioła, aviečki, koni, kozy).
«Taksama viadziecca nazirańnie za kliničnym stanam zdaroŭja ŭsprymalnych žyvioł. Nieabchodnyja miery pryniaty svoječasova», — padkreśliŭ namieśnik ministra.
Jak paviedamiła namieśnik ministra achovy zdaroŭja — hałoŭny dziaržaŭny sanitarny ŭrač Natalla Žukava, vyznačany ŭsie kantaktnyja asoby, arhanizavana nazirańnie za ich stanam zdaroŭja. Padčas abchodaŭ dvaroŭ maksimalna vyjaŭlena koła tych, chto moh kantaktavać z chvoraj žyviołaj.
«Usie jany nieadnarazova ahledžany lekaram, štodnia pravodzicca kantrol stanu zdaroŭja, skarhaŭ niama, — skazała jana. — Tym, chto niepasredna kantaktavaŭ z žyviołaj, pryznačanaja antybijotykaprafiłaktyka».
Namieśnik ministra padkreśliła, što inkubacyjny pieryjad dla ludziej užo skončyŭsia, heta značyć čas, na praciahu jakoha mahło prajavicca zachvorvańnie, prajšoŭ.
«Nijakich nastupstvaŭ dla zdaroŭja ludziej my nie zafiksavali», — skazała jana, adznačyŭšy, što, pakolki inkubacyjny pieryjad dla žyvioł praciahvajecca, nazirańnie jašče viadziecca.
Pašu, dzie paśviŭsia koń, pakul što nie vykarystoŭvajuć.
