«Siońnia abvalili častku avaryjnaj ściany, a ŭ piatnicu abrynułasia apošniaja kałona. Ciapier kaścioł jezuitaŭ vyhladaje tak z boku ŭnutranaha panadvorka», — napisaŭ u svaim Instagram błohier Dzianis Kaściukievič.
Jezuicki kaścioł archanhieła Michaiła ŭ Mścisłavie — pomnik architektury XVIII stahodździa. Chram pačaŭ razburacca daŭno. Uletku 2017 kałona i arki sa sklapieńniem, jakija jana trymała, abrynulisia z-za taho, što niama dachu. Praz 2 miesiacy razvaliłasia častka ściany. Budynak ekstrana abharadzili. U susiedniaj škole mastactvaŭ spynili zaniatki.
Hramadskija aktyvisty i žurnalisty zaklikali ŭłady zachavać histaryčnuju spadčynu. Ministerstva kultury Biełarusi padrychtavała pieralik pieršačarhovych mier. Pačaŭsia zbor srodkaŭ i praktyčna «vyratavalnaja apieracyja» na abjekcie.
U sakaviku hetaha hoda telekanał «Biełaruś 1» paviedamlaŭ, što spynić razbureńnie pomnika architektury dapamoža «ŭnikalny budaŭničy prajekt» — u budynku źjavicca mietaličnaja apora. Takuju technałohiju paśpiachova aprabavali na adnaŭleńni niekalkich chramaŭ Biełarusi. U siužecie śćviardžałasia, što mantaž hetaj apory ŭžo pačaŭsia. Jana budzie padtrymlivać apornyja kanstrukcyi budynka.
Na miescy abvalvańnia kałony ŭ praścienku chacieli ŭstalavać ŭzmacnieńnie za košt mietaličnych stojek, a novuju kałonu apranuć u bieton.
Voś što tady kazaŭ Vital Šmataŭ, namieśnik staršyni Mścisłaŭskaha rajvykankama: «Raboty na abjekcie praciahvajucca. Ja dumaju, u najbližejšyja niekalki miesiacaŭ skončacca pracy pa źniaćci avaryjnaści, i dalej buduć praciahvacca raboty pa kansiervacyi abjekta. Kab u najbližejšy čas možna było puścić dziaciej u najbližejšyja budynki. A taksama turysty, kab mahli padyści da budynka, pahladzieć».
U červieni stała viadoma, što na vyratavańnie kaścioła ŭ druhim kvartale biahučaha hoda vyłučyli 550 tysiač rubloŭ z abłasnoha i respublikanskaha biudžetaŭ i adnaho z fondaŭ prezidenta.
