Abo akcyi kramaŭ, kštałtu kupi na peŭnuju sumu tavaraŭ — i budzie tabie ščaście.
«Naša Niva» sabrała historyi biełarusaŭ, jakim kaliści pašancavała, chacia i ŭ drabiazie, ale ž pašancavała.
Alaksiej: vyjhraŭ dysk z kampjutarnaj hulnioj za historyju pra kambajniera
«Umovaj internet-konkursu było prydumać aryhinalny siužet dla kampjutarnaj hulni ź biełaruskim kałarytam. Ja napisaŭ historyju kambajniera ź biełaruskaj hłybinki Hieny Zapałkina: «Niedalokaja budučynia… Biełaruś zahrazła ŭ daŭhach, i jaje aharadzili płotam. U krainie chaos i razbureńnie. U zvyčajnym siale pracuje Hiena Zapałkin na kambajnie. Karaciej, złamali kambajn jamu, skrali ŭsio, što ŭ jaho było. A žonka źjechała sa staršynioj kałhasa ŭ Minsk, dzie jašče, pa čutkach, zastałasia narmalnaja cyvilizacyja. Najlepšy siabar za butelkaj samahonki sprabuje suciešyć siabra, ale raptam u jaho z kišeni vypadaje zapiska ad staršyni z tekstam, kab toj zabiŭ Hienu. Adbyvajecca sutyčka, Hiena zabivaje byłoha siabra i adpraŭlajecca ŭ niebiaśpiečnaje padarožža ŭ Minsk, kab viarnuć žonku…» Za hetuju historyju atrymaŭ dysk z hulnioj Call of Duty: Ghost.
Paśla jašče udzielničaŭ u rozyhryšach vejpaŭ ad mahazina, jaki niadaŭna adkryŭsia. Dyk voś vejpy i vadkaść dla ich ja vyjhravaŭ, byvała, pa niekalki razoŭ za miesiac. Šancavała mnie ŭ randomie».
Nastaśsia: dziakujučy padhuźnikam, vyjhrała rovar
«U mianie jość maleńkaje dzicia, i tolki dziakujučy jamu ja ažyćciaviła maru svajho dziacinstva. Amal hod tamu prachodziła akcyja ŭ kramie, tam treba było nabyć padhuźniki na sumu, bolšuju za 39 rubloŭ, zapoŭnić ankietu — i ŭdzielničać u rozyhryšy kaštoŭnych pryzoŭ. Ščyra kažučy, kupla padhuźnikaŭ była prosta nieabchodnaściu, ni pra jakija pryzy ja navat nie dumała. Ale ŭsio adno kupiła, zapoŭniła ankietu. I adnojčy ranicaj — zvanok i vinšavańni! A pra ŭłasny rovar ja maryła ź dziacinstva, zahadvała na Novy hod, prasiła ŭ baćkoŭ na Dzień naradžeńnia. Ale nie daryli i nie daryli. A voś tak atrymałasia, što moj syn «padaryŭ» mnie rovar».
Dźmitryj: za słohan dla budaŭničaj firmy atrymaŭ domik dla lalek i 1000 rubloŭ
«Na niejkaj staroncy trapiŭsia na vočy konkurs na najlepšy słohan dla budaŭničaj firmy. Ja prydumaŭ taki: «Prosta budujem składanaje». Niečakana hety słohan spadabaŭsia. I za heta dačce padaryli lalečny dom, a mnie 1000 rubloŭ, jakija ja addaŭ žoncy. My z dačkoj tak natchnilisia jaje padarunkam, što paśla zrabiŭ ja ŭžo sam joj «asobnyja apartamienty» z kardonu».
Voś taki domik atrymaŭ u padarunak Dźmitryj.
A voś na taki dom Dźmitryja natchniła pieramoha ŭ konkursie.
Pavieł: paviačeraŭ u restaranie tar-taram i supam ź biełych hryboŭ
«Byŭ zvyčajny konkurs repostaŭ na viačeru ŭ restaranie ŭ Minsku. Vyjhraŭ, zaprasili ŭdvaich z žonkaj. U mieniu była sałata, sup ź biełych hryboŭ, adbiŭnaja, tar-tar ź jałavičyny i kaktejli. Suma vyjšła nievialikaja, ale nie prapadać ža vyjhryšu».
Kaciaryna: na kaśmietyčnyja pracedury hrošy nie vydatkoŭvaju daŭno
«Znajšła supołku «Ukantakcie», dzie rehularna razyhryvajuć roznyja bjuci-pracedury. Nazapasiła sabie i stryžak, i manikiura, i vypramleńnia vałasoŭ, i pasłuh kaśmietołaha na hod napierad».
Julija: atrymała ŭ padarunak kvietku ŭ haršku
«Konkurs byŭ u instahramie. Vykanała ŭsie ŭmovy kramy kvietak, što pravodziła rozyhryš. I stała pieramožcaj. Hetaja kvietka čamuści zapomniłasia, a kolkaść kubkaŭ, štodziońnikaŭ, biletaŭ u kino, roznych źnižak ja navat nie liču».
Padarunak ad kramy kvietak.
Kaciaryna: vyjhrała abutak… Ale nie svajho pamieru
«Krama abutku pravodziła rozyhryš. Pieramahła, a kali pryjšła pa pryz, mnie skazali, što pieramožcu rozyhryšu skazali ŭručyć mienavita hetuju paru abutku. Našto tady pytalisia, jaki ŭ mianie pamier, nieviadoma. Ale dziakuj usio adno. Paśla pradała hetyja krasoŭki na «Kufry».
Alaksandr: vyjhraŭ aŭtamabil «Folksvahien». Nie za repost, a za sms
«Hadoŭ ź dziesiać tamu mabilny apieratar pravodziŭ rozyhryš aŭtamabila. Treba było adpravić sms na peŭny numar. Ja i adpraŭlaŭ. Paśla paličyŭ, što na smski vydatkavaŭ 800 dalaraŭ. Ale ž mašynu ŭsio ž vyjhraŭ, adjeździŭ spraŭna, pradaŭ nie tak daŭno».
A vam ščaściła štości vyjhravać?
