Lidar hurta Drum Ecstasy ciapier žyvie ŭ ZŠA. Ale adznačaje, što heta časova.

Filip Čmyr

Filip Čmyr

«Maja žonka Alena pracuje ŭ AAN, u Fondzie ŭ halinie narodanasielnictva. Paŭhoda tamu jana pierajechała pracavać u hałoŭny ofis arhanizacyi ŭ Ńju-Jork. Ja pačakaŭ, pakul syn skončyć vučobu ŭ škole, i my taksama pierabralisia ŭ Štaty, — raspavioŭ «Našaj Nivie» Filip Čmyr. — U treci kłas syn pojdzie ŭžo ŭ škołu pry AAN. Jana aryjentavanaja na dziaciej roznych nacyjanalnaściaŭ, jakija mohuć navat nie viedać anhlijskuju movu.

Sam ja ŭvohule žyvu na dva damy. Voś u vieraśni palaču ŭ Biełaruś hrać kancerty, vierasień u nas zaŭsiody aktyŭny. Paśla kastryčnik i listapad «miortvyja» ŭ płanie vystupaŭ, tamu budu ŭ ZŠA».

Čmyr pryznajecca, što jaho biełaruskija zarobki mizernyja ŭ paraŭnańni ź ńju-jorkskimi cenami:

«Žyllo my zdymajem sami, sami apłočvajem. U nas zvyčajnaja siaredniaja kvatera, dźvie spalni. Žyllo šalona darahoje, košty nazyvać nie chaču, ale ŭ paraŭnańni ź biełaruskimi cenami ńju-jorkskija prosta nie ŭkładvajucca ŭ hałavie. Tamu asnoŭny karmilec, kaniečnie, ciapier žonka. Maich zarobkaŭ chapaje na kvitki, kab źlatać u Biełaruś i nazad, nu i jašče zastajecca troški. Ja žartuju tak: siamju zabiaśpiečvaje mama, a ja chatniaja haspadynia ź vialikaj kolkaściu chobi».

Filip padkreślivaje — pierajezd časovy, usio zaležyć ad pracy žonki.

«Jaje mohuć nakiravać u lubuju inšuju krainu, i tady pryjdziecca ŭsioj našaj siamji znoŭ mianiać miesca žycharstva. Nakirujuć u Afhanistan, naprykład, jak ja žartuju. Tamu ja nie šukaju pracu ŭ ZŠA, praciahvaju pracavać addalena: ja ivent-mieniedžar, zajmajusia arhanizacyjaj mierapryjemstvaŭ u Minsku, pradumvaju ich kancepcyju, łahistyku. Ciapier tearetyčnuju častku my abmiarkoŭvajem praź miesiendžary, a kab arhanizavać usio, ja prylataju ŭ Biełaruś. Praca idzie narmalna, chiba što niazručna ŭskokvać pa načach, kab adkazać na zvanki, usio ž roźnica ŭ časie», — kaža Filip Čmyr.

Taksama jon płanuje arhanizavać vystupy svajho hurta Drum Ecstasy ŭ Ńju-Jorku. Kaža, što heta moža navat prynieści prybytak.

«Bo tut zusim inšyja košty na kvitki. Na vystup u kłubie kvitki kaštujuć minimum 35 dalaraŭ. Heta na niejki džaz-bend, na jaki ŭ Minsku i za 5 baksaŭ by narod nie pajšoŭ. Tamu, dumaju pasprabavać damovicca ab kancertach Drum Ecstasy, chaciełasia b pašyryć našuju hastrolnuju hieahrafiju», — kaža Čmyr. 

Čytajcie:

Filip Čmyr piśmova paprasiŭ arhanizataraŭ fotavystavy «z pavahaj stavicca da ruskamoŭnaha nasielnictva»

Čmyr napisaŭ čarhovuju skarhu — vinavacić arhanizataraŭ fotavystavy ŭ ckavańni

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?