25 žniŭnia ŭ Mahilovie ŭ dalečyni ad ludnych vulic adbyŭsia dazvoleny ŭładami 30-chvilinny pikiet suprać zakonu ab admienie adterminovak ad vojska, piša «Radyjo Svaboda».
Za dvuma pikietoŭcami nazirali čaćviora mužčynaŭ u cyvilnym, a taksama bryhada chutkaj dapamohi z troch čałaviek. La ŭdzielnikaŭ prajšli dvoje amapaŭcaŭ.
Amapaŭcy patrulavali zdalok.
Pikietoŭcy stajali na biehavoj darožcy stadyjonu na vulicy Čaluskincaŭ. Ad haradzkoha centru da hetaha miesca možna dabracca za 10 chvilinaŭ na hramadzkim transparcie.
Pikiet inicyjavaŭ navučeniec mahiloŭskaha ekanamičnaha prafesijna-techničnaha kaledžu Alaksiej Maisiejeŭ. Jon vyrašyŭ padtrymać zaklik ruchu RrotestBY, pakolki zakon ab admienie adterminovak u chutkim časie zakranie i jaho. Alaksiej choča praciahnuć vučobu ŭ vyšejšaj navučalnaj ustanovie. Jon skončyŭ dva kursy kaledžu, vučycca zastałosia paŭtary hady. «Ja nia suprać terminovaj słužby, ale, kali ja chaču vučycca, to čamu mnie pavinny heta zabaraniać», — kaža jon.
Alaksiej kazaŭ Svabodzie, što kiraŭnictva kaledžu, kali daviedałasia pra jaho namier zładzić pikiet, «rekamendavała» admovicca ad hetaj idei i źmirycca ź niepaźbiežnaściu terminovaj słužby. Jamu skazali, što svajoj akcyjaj chłopiec «padstaŭlaje» navučalnuju ŭstanovu. Pavodle Alaksieja bolš pretenzijaŭ da jaho nie było. «Spadziajusia i nia budzie, bo ja ž usio rablu pavodle zakonu», — kaža jon.
Alaksiej raniej nia ŭdzielničaŭ u akcyjach pratestu. Za pasłuhi «chutkaj dapamohi» chłopiec zapłaciŭ 12 rubloŭ. Pasłuhi milicyjantam pakul zastajucca nie apłačanymi. Za ŭsio razam jon maje zapłacić kala 100 rubloŭ.
Da pikieta Alaksieja Maisiejeva dałučyŭsia jahony siabra, taksama Alaksiej, jaki nie pažadaŭ nazvać svajo proźvišča.
Na praciahu 30 chvilinaŭ pacikavicca, što adbyvajecca na stadyjonie, padyšła tolki žančyna z unučkaju. Raspytvała jana pra akcyju pravaabaroncaŭ i žurnalistaŭ.
Medyki z «chutkaj dapamohi» zdymali pikiet na videa. Adzin ź ich skazaŭ, što bačyć pikiet z dvuch udzielnikaŭ niazvykła. «Hety prykład zarazny, — zaŭvažyŭ jon, — Mahčyma dalej budzie i bolš».
Pikiet prajšoŭ biez ekscesaŭ. Chłopcy padziakavali za ŭvahu, tym chto pryjšoŭ pahladzieć na ich pratest.
