Jepiskapam Połackim i Hłybockim staŭ 49-hadovy Ihnacij.

Jepiskap Ihnacij. Fota eparhia992.by

Jepiskap Ihnacij. Fota eparhia992.by

31 žniŭnia Śviaščenny sinod Ruskaj pravasłaŭnaj carkvy razhladaŭ prašeńnie archijepiskaha Połackaha i Hłybockaha Fieadosija (Bilčanka) ab sychodzie na pakoj. Takoje prašeńnie śviatar padaje pry dasiahnieńni 75 hadoŭ, a ŭžo potym sinod vyrašaje, ci zadavalniać jaho.

U vypadku ź Fieadosijam prašeńnie było vyrašana zadavolić. Ciapier archijepiskap Fieadosij budzie znachodzicca na pakoi ŭ Połacku, materyjalna jaho budzie ŭtrymlivać Połackaje jeparchijalnaje ŭpraŭleńnie.

U toj samy dzień byŭ pryznačany novy jepiskap u Połack. Im staŭ 49-hadovy Ihnacij (Łukovič). Za apošni hod Ihnacij zrabiŭ imklivuju karjeru.

Ihnacij (śvieckaje imia Ihar Łukovič) naradziŭsia ŭ Maładziečnie. Jahonaja maci — manachinia Sałamonija. Admietna, što žyvie jana nie ŭ biełaruskim manastyry, a ŭ Bahalubskim žanočym manastyry, heta Suzdalski rajon u Rasii. Baćka ŭžo pamior.

Pa śvieckaj adukacyi Ihnacij — radyjomiechanik.

Potym vučyŭsia ŭ Minskaj duchoŭnaj sieminaryi i Maskoŭskaj duchoŭnaj akademii.

Byŭ pastryžany ŭ manachi archimandrytam Huryjem (na toj momant jašče nie archijepiskapam Navahrudskim) u 1993 hodzie. Atrymaŭ manaskaje imia Ihnacij.

Vykładaŭ u Minskaj duchoŭnaj sieminaryi historyju ruskaj carkvy i liturhiku. U 2002 hodzie staŭ nastajacielem carkvy ŭ honar Cichvinskaj ikony Maci Božaj u Breście.

Uznačalvaŭ pałomnicki adździeł Bresckaj jeparchii. 

Letaś Ihnacij staŭ vikarnym jepiskapam Baraŭlanskim. Našy krynicy ŭ BPC kažuć, što asnoŭnymi abaviazkami Ihnacija ŭ Minskaj jeparchii było sačeńnie za budaŭničymi prajektami. Mienavita jon kuryravaŭ budaŭnictva, jakoje adbyvajecca ŭ Rakaŭskim pradmieści, niedaloka ad budynka jeparchijalnaha ŭpraŭleńnia. Heta ŭvachodziła ŭ štodzionnyja abaviazki Ihnacija.

«Jašče ŭ Breście Ihnacij zarekamiendavaŭ jak śviatar, jaki ŭmieje pracavać sa sponsarami, znachodzić hrošy na budaŭnictva. U samim ža budaŭnictvie jon vyhladaŭ vielmi hruntoŭnym, pakazvaŭ jeŭrapiejski padychod», — raskazali nam.

«Siońnia ŭ BPC jość razumieńnie, što treba niešta rabić pa-novamu, ale niama razumieńnia, što kankretna. U hetym płanie budzie cikava nazirać, jak Ihnacij budzie vybudoŭvać adnosiny ź miascovymi supolnaściami. Dumaju, što jon pavinien być dastakova adkrytym dla inicyjatyvaŭ i prapanovaŭ źnizu», — apaviali «Našaj Nivie».

Što tyčycca archijepiskapa Fieadosija, to ŭnutry BPC jon mieŭ reputacyju takoha «baćki-duchoŭnika», jakoha cikavili pytańni abradnaści i marali, ale jon nie duža źviartaŭ uvahi na niejkija sacyjalnyja źjavy. «Zdajecca, jamu nie padabałasia ŭsia hetaja administratyŭnaja praca na čale jeparchii. Jon viadzie dastatkova zatvornicki ład žyćcia, jamu padabajecca refleksavać».

Hłybocki krajaznaŭca Kastuś Šytal uspaminaje, što pry adkryćci pomniku protapreśvitaru Vitalu Baravomu ŭ miastečku Parafjanava archijepiskap Fieadosij skazaŭ, što «Ukrainu my ŭžo stracili». «U hetym płanie jon byŭ prychilnikam Rasii. Pry hetym u vioskach zaŭsiody vitaŭsia ź ludźmi pa-biełarusku: «Sa śviatam», — zhadvaje Šytal.

Jak paviedamlajuć Žurnały pasiadžeńnia Sinoda Biełaruskaha Ekzarchata, źjaviŭsia taksama vikarny jepiskap u Homielskaj jeparchii z tytułam «Śvietłahorski». Im staŭ staršynia Sinadalnaj kamisii pa kananizacyi śviatych BPC Amvrosij (Šaŭcoŭ).

* * *

Udakładnieńnie. U pieršym abzacy ŭ pačatkovym varyjancie artykuła jepiskap Ihnacij byŭ pamyłkova nazvany Fieadosijem.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?