Były ministr abarony ZŠA Džejms Mecis miarkuje, što Pakistan źjaŭlajecca samaj niebiaśpiečnaj dziaržavaj z tych, z pradstaŭnikami jakich jamu davodziłasia ŭzajemadziejničać. Taki punkt hledžańnia jon vykazaŭ u aŭtorak padčas vystupu ŭ Radzie pa mižnarodnych adnosinach u Ńju-Jorku, piša tass.ru.
Mecisa paprasili prakamientavać śćvierdžańnie, jakoje tyčycca hetaj krainy, u jaho knizie «Pazyŭny «Chaos»: vučymsia kiravać» (Call Sign Chaos: Learning to Lead), jakaja pastupiła ŭ ZŠA ŭ prodaž u aŭtorak. Były ministr abarony ŭ miemuarach adznačaŭ: «Ja liču Pakistan najbolš niebiaśpiečnaj z usich krain, ź jakimi ja mieŭ spravu».
Eks-kiraŭnik Pientahona rastłumačyŭ, što trymajecca hetaha punktu hledžańnia z-za «radykalizacyi hramadstva» u Pakistanie. «Darečy, takoha ž mierkavańnia trymajucca pakistanskija vajskoŭcy. Jany razumiejuć, što tam adbyvajecca. Jany heta ŭśviedamlajuć», - dadaŭ jon.
«Adnosiny pamiž nami i Pakistanam vielmi składanyja, —padkreśliŭ Mecis. — Kali ŭličvać pašyreńnie radykalnych idej u hramadstvie i dadać da hetaha toje, što jadzierny arsienał [Pakistana], jak ja miarkuju, raście najchutčej u śviecie, to vy zrazumiejecie, čamu nam treba zasiarodzicca na kantroli nad uzbrajeńniami i namahańniach pa zabieśpiačeńni režymu nieraspaŭsiudžvańnia».
Mecis uznačaliŭ Pientahon u studzieni 2017 hoda. Jon padaŭ prašeńnie ab adstaŭcy ŭ śniežni 2018 hoda. Heta adbyłosia nieŭzabavie paśla taho, jak prezident ZŠA Donald Tramp abviaściŭ ab rašeńni pačać vyvad amierykanskich vojskaŭ ź Siryi.
Mecis raniej zajaŭlaŭ, što syšoŭ z pasady z-za razychodžańniaŭ u pohladach z prezidentam ZŠA. Tramp nieadnarazova staviŭ pad sumnieŭ vyniki jaho pracy na pasadzie ministra abarony i vykazvaŭ niezadavolenaść jaho raniejšymi rašeńniami.
