Milicyja 3 vieraśnia zatrymała padazravanych u razbojnym napadzie na juvielirnuju kramu «Jachant» pa vulicy Kisialova ŭ Minsku. Zaraz ažyćciaŭlajucca śledčyja dziejańni. Pa miescy žycharstva praviedzienyja pieratrusy, paviedamlaje pres-sakratar MUS Volha Čamadanava ŭ svaim telehram-kanale.
Taksama praviarajecca datyčnaść zatrymanych da ździajśnieńnia inšych złačynstvaŭ: jašče jak minimum troch razbojnych napadaŭ na pryvatnyja damy.
Nahadajem, što škoda, pryčynienaja kramie ŭ vyniku razboju, skłała bolš za 1 młn rubloŭ. Častka vykradzienaha była schavanaja ŭ tajniku, abstalavanym doma ŭ svajakoŭ adnaho z padazravanych. Akramia taho, kanfiskavanyja płastykavyja ściažki. Takija ž vykarystoŭvalisia, kab źviazać supracoŭnika «Jachanta».
Razbojny napad byŭ ździejśnieny 17 žniŭnia pryblizna ŭ 11.30. Dvoje mužčyn uvajšli ŭ pamiaškańnie, raspylili piarcovy haz, źviazali ruki adnaho pradaŭca płastykavaj ściažkaj, a na druhoha nadzieli kajdanki. Vykraŭšy ŭsie kaštoŭnaści ź vitryny, nalotčyki źbiehli. Naviedvalnikaŭ u kramie ŭ hety momant nie było.
Pa dadzienym fakcie Śledčym kamitetam była zaviedziena kryminalnaja sprava pa art. 207 (razboj, učynieny hrupaj asob).
