Ašukancy padmanam prymusili padnačalenaha brytanskaj kampanii pieravieści im 243 tysiačy dalaraŭ, vykarystoŭvajučy zymitavany z dapamohaj štučnaha intelektu hołas jaho kiraŭnika, piša The Wall Street Journal.
Hienieralny dyrektar brytanskaj enierhietyčnaj firmy dumaŭ, što razmaŭlaŭ pa telefonie sa svaim načalnikam, vykanaŭčym dyrektaram niamieckaj hałaŭnoj kampanii. Bos paprasiŭ jaho terminova 243 tysiačy dalaraŭ vienhierskamu pastaŭščyku.
Dyrektar brytanskaj firmy paznaŭ akcent i tembr načalnika, tamu vykanaŭ prośbu. Ale ašukancy patelefanavali jašče dvojčy. Paśla pieravodu hrošaj jany skazali, što niamieckaja kampanija adpraviła brytanskaj sumu na pakryćcio strat. U treci raz jany zapytali druhi płaciež. Adnak abiacany pierakaz jašče nie pryjšoŭ, a zvanok pastupiŭ z aŭstryjskaha numara. Tady brytaniec zapadozryŭ niadobraje i nie staŭ płacić jašče raz.
Hrošy syšli na rachunak vienhierskaha banka, zatym byli pieraviedzieny ŭ Mieksiku i dalej razyšlisia pa roznych miescach. Detektyvam nie ŭdałosia vyjavić nivodnaha padazravanaha.
Incydent staŭ pieršym takim zarehistravanym złačynstvam u Jeŭropie.
