Infarmacyjnaja chvala, jakaja padniałasia paśla publikacyi «Kamiersanta» ab stvareńni ledź nie (kan)fiederatyŭnaj dziaržavy, sparadziła dźvie najbolš raspaŭsiudžanyja reakcyi ŭ biełaruskim miedyjnym poli. Nie budziem davać im akreśleńnia, kab nie viešać zahadzia cetlikaŭ. Najbolš jaskrava i ŭdała ich reprezientavali z adnaho boku Mikałaj Statkievič, z druhoha — Arciom Šrajbman.
Tezisy Statkieviča zvodzilisia da taho, što faktyčna heta ekanamičnaje pahłynańnie Biełarusi jak dziaržavy. Pazicyja Šrajbmana zvodziłasia da taho, što ničoha novaha (kali navat napisanaje ŭ artykule praŭda) u hetych damovach niama i jany, jak ŭsie papiarednija, buduć viaznuć u biaskoncych rabočych hrupach pamiž uradami dźviuch krain.
Adnak, pryhledzieŭšysia da situacyi bolš detalova, my možam kazać ab tym, što prava na žyćcio majuć abodva padychody, prytym jany nie nadta mocna mohuć supiarečyć adzin adnamu.
Pahłynańnie Biełarusi ŭ najbližejšyja niekalki hadoŭ chutčej niejki fantastyčny scenaryj i tut całkam maje racyju spadar Šrajbman, kažučy pra toje, što kali adkinuć jaskravyja žurnalisckija štampy «Kamiersanta», to faktyčna ad artykuła ničoha nie zastaniecca. Lubyja kroki, jakija mahli by niejak realna pahražać uładzie Łukašenki, buduć tapicca ŭ biaskoncych pieramovach pamiž ludźmi, jakija nie majuć paŭnamoctvaŭ dla vyrašeńnia pytańniaŭ takoha ŭzroŭniu, takija paŭnamoctvy maje tolki sam Łukašenka. Raspracoŭka ahulnaj padatkovaj palityki ŭvohule zadača nie na adzin dziasiatak hadoŭ.
Dy i davajcie budziem ščyrymi: niaŭžo niechta ŭsurjoz vieryć u toje, što postać uzroŭniu Łukašenki hatova stać jakim-niebudź hienierał-hubiernataram, tolki dziela zachavańnia ŭłady/asabistaj biaśpieki? U prykład lubiać pryvodzić ucioki Janukoviča z Ukrainy, jaho faktyčnaje zaprašeńnie rasijskich vojskaŭ va Ukrainu. Adnak paraŭnoŭvać hetyja dźvie postaci prosta absurdna: niahledziačy na ŭsie svaje minusy, Łukašenka sapraŭdy talenavity palityk i vielmi chitry hulec, u adroźnieńnie ad Janukoviča, jaki, prymiarajučy na siabie rolu dyktatara, pakazaŭ svaju poŭnuju biazdarnaść. Łukašenka i Pucin — ludzi adnaho kalibru, jany zachopleny svajoj absalutnaj uładaj, nichto ź ich nie pahadziŭsia b stać druhim.
U toj ža čas kiejs Ukrainy nas dobra padvodzić da pazicyi, jakuju prezientavaŭ Statkievič. Niachaj nie siońnia, ale padobnyja damovy niasuć u sabie patencyjnuju pahrozu dla niezaležnaści krainy. Dośvied Ukrainy pakazvaje, što stratehija pucinskaj Rasii palahaje na pošuku ŭraźlivaściaŭ u dziaržaŭnaj sistemie, prasoŭvańni «trajanskaha kania» praz uraźlivyja miescy sistemy, a zatym čakańnie spryjalnych umoŭ dla razhortvańnia svaich płanaŭ. Rolu «trajanskaha kania» syhrali va Ukrainie damovy ab pradaŭžeńni arendy vajenna-marskoj bazy ŭ Krymie, a taksama naftahazavyja damoŭlenaści. Pucin, hulajučy ŭ hieapalityčnyja šachmaty, nie śpiašajecca stavić mat, jon hulaje ŭ doŭhuju, pierastaŭlaje ź miesca druharadnyja fihury, raśsiejvaje ŭvahu inšych hulcoŭ. A potym akazvajecca, što jak by i padziecca karalu bolš niama kudy.
Ci źjaŭlajucca damoŭlenaści, ab jakich pisaŭ «Kamiersant», takim «trajanskim kaniom» Pucina? Dumaju, što nie. Ci źjaŭlajucca hetyja damoŭlenaści čarhovym krokam u kambinacyi? Dumaju, što tak.
U hetaj situacyi isnuje krytyčnaja nieabchodnaść zrabić kroki pa ŭmacavańni vidavočna słabych bakoŭ isnujučaj sistemy kiravańnia, jakija, darečy, całkam supadajuć z prablemami, jakija isnavali va Ukrainie pierad napadam Rasii ŭ 2014 hodzie:
1. Kantrol za infarmacyjnaj prastoraj.
Ab hetym kazali stolki, što dadatkova niama sensu tłumačyć.
2. Nizkaja łajalnaść drobnaha i siaredniaha čynoŭnictva.
Ab hetym pytańni kažuć značna mieniej. Pravodziačy paraleli z Ukrainaj, mienavita hetyja prasłojki čynoŭnictva najbolš prychilna pastavilisia da sieparatysckich idej i stali aporaj dla anieksii Kryma i vajny na Danbasie. Mienavita heta prasłojka sabatavała zahady vyšejšaha kiraŭnictva, stanaviłasia na bok inšaj krainy. Biełaruskaje drobnaje i siaredniaje čynoŭnictva žyvie ŭ paraŭnańni z rasijskim vielmi ścipła, nie viedaje takoha ž ŭzroŭniu niezakonnaha ŭzbahačeńnia. Plus zaŭsiody maje miesca matyvacyja prasunucca pa leśvicy vyšej. Kali chočacie pryhožuju paralel, chto ŭ VKŁ chacieŭ bolš za ŭsio złučycca z Polščaj ŭ Reč Paspalituju? Mienavita drobnaja i častkova siaredniaja šlachta, jakaja zajzdrościła «załatym šlachieckim volnaściam» polskaj šlachty. Jaskrava suprać byli mahnaty VKŁ, jakija mieli tut uładu. Časy iduć, adnak čałavieku ŭłaściva słaba źmianiacca, i «zdačy» Biełarusi ja by chutčej čakaŭ nie ad Łukašenki, Makieja, Rumasa ci Raŭkova, a ad nizavoha ŭzroŭniu, kali raptam ŭźniknie turbulentnaść u najvyšejšych kołach.
