U hetuju vosieńskuju subotu Kupałaŭski teatr hučna adznačyŭ pačatak 100-ha tvorčaha siezona. 21 vieraśnia ŭ centry Minska prajšoŭ pieršy ŭ krainie teatralny piknik. Hości pastavilisia da mierapryjemstva adkazna. «I niachaj krapaje, krapaje ź nieba», ale mnohija pryjšli ź pledami i buterbrodami — piknik usio ž taki. Było šmat muzyki i ježy, prahułki pa zakuliśsi z dvornikam Horvatam, uroki teatralnaha etykietu i navat adkryty kastynh akcioraŭ na rolu ŭ Kupałaŭskim.
Leta — heta nie para hoda, a stan dušy, — vyrašyli kupałaŭcy i abjavili teatralny piknik. Usim haściam śviata prapanoŭvali brać z saboj koŭdry, i nie darma: uładalnik samaha vialikaha pleda atrymaŭ zaprašeńnie na zakrytyja pakazy premjernych śpiektaklaŭ ciaham usiaho 100-ha siezona. Uładalnicami hetaha kaštoŭnaha pryza stali Hanna Vosipava i Danara Hareckaja. Dziela prava bačyć premjery Kupałaŭskaha raniej za astatnich dziaŭčaty ceły dzień sšyvali 9 pledaŭ u adzin — atrymałasia 19 kvadratnych mietraŭ ciopłaj tkaniny. Druhoje miesca i zaprašeńnie na pieradpakazy premjer atrymała Maryja Dźmitrusik ź pledam na 12,6 kvadratnaha mietra. Takimi koŭdrami možna sahreć ci nie pałovu parku!
Ad 7-j hadziny ranku placoŭku Alaksandraŭskaha skviera dla haściej rychtavaŭ aŭtar našumiełaj knihi «Radziva Prudok» Andruś Horvat. Da ŭźlotu litaraturnaj karjery Andruś pracavaŭ dvornikam u Kupałaŭskim teatry i ŭ honar śviata na adzin dzień viarnuŭsia na byłuju rabotu. Da 23:00 papularny piśmieńnik padmiataŭ liście i rabiŭ prastoru skviera kamfortnaj dla naviedvalnikaŭ. U dadatak da asnoŭnaj pracy, abajalny dvornik paśpieŭ pravieści haściej pa zakuliśsi Kupałaŭskaha. Ekskursii ŭklučali ahlad hrymiornych pakojaŭ, majsterniaŭ dy inšych pamiaškańniaŭ i kalidoraŭ, zvyčajna schavanych ad vačej hledača. Urešcie, 21 vieraśnia ŭpieršyniu hledačy zmahli pahladzieć śpiektakl «Radziva Prudok» na adkrytym pavietry — žyvuju tranślacyju z teatralnaj sceny ładziŭ videaservis VOKA.
Viadomaja błohierka i śpiecyjalistka pa etykiecie Aksana Zareckaja raskazała minčukam, jak pryjści ŭ teatr i nie vyhladać dzivakom. Prafiesijanałka hrymiornaha ramiastva Mirasłava Deksi na vačach publiki źmianiała źniešnaść madelaŭ da niepaznavalnaści. Dzieci asabliva ŭpadabali animatarskuju placoŭku, dzie mahli atrymać u padarunak cacku abo pazmahacca na «špahach», vyrablenych z pavietranych šaroŭ. Tam ža ich baćki prymiarali na siabie vusy Janki Kupały i anturažny kaścium. Akramia stałaj teatralnaj kaviarni «Uršula», u skviery pracavaŭ street-bufiet, jaki častavaŭ naviedvalnikaŭ aŭtarskimi teatralnymi setami: «Noč na Kalady», «Čornaja panna Niaśviža», «Ludzi na bałocie», «ČajKa» dy inšymi stravami.
Jak kažuć, talenavityja ludzi talenavityja va ŭsim — šmat chto z kupałaŭcaŭ taksama zajmajecca muzykaj. Naprykład, adzin z hurtoŭ, jaki vystupaŭ na pikniku, — ili-ili — heta prajekt akcioraŭ Dźmitryja Jesianieviča, Michaiła Zuja i muzykanta teatralnaha arkiestra Eryka Arłova-Šymkusa. Akramia ich, u muzyčnaj prahramie uziali ŭdzieł Jahor Zabiełaŭ, Śviatłana Bień, hurt «Kasijapieja» dy inšyja. Asobnaj častkaj prahramy staŭ kancert kupałaŭcaŭ, dzie tyja vykonvali najlepšyja svaje pieśni sa śpiektaklaŭ «Paŭlinka», «Teatr Uršuli Radzivił», «Miestačkovaje kabare», «Vieltmajstar-akardeon», «Pinskaja šlachta».
Zaviaršyŭ mierapryjemstva śviatočny kancert, ale pierad tym Kupałaŭski teatr pravioŭ pieršy ŭ historyi adkryty kastynh. Prosta na vulicy kožny achvotny moh vyjści na scenu i ciaham chviliny prademanstravać svaje talenty. Pa vynikach kastynhu členy žury — Raman Padalaka i Pavieł Charłančuk — adabrali pa try finalisty ŭ darosłaj i dziciačaj uzrostavych hrupach. Siarod dziaciej favarytami stali Miłana Kulišova, Taćciana Turoŭskaja i Hanna Moštyl. U darosłaj katehoryi u finał prajšli Tamara Dziemiančuk, Kaciaryna Končyc i Vieranika Mankievič. Kankursanty śpiavali, začytvali manałohi, dekłamavali vieršy kłasikaŭ i navat ułasnaha sačynieńnia. Bližejšym časam režysiory Kupałaŭskaha abiaruć ź finalistak dźviuch akciorak, jakija vystupiać na vialikaj scenie ŭ śpiektaklach «Paŭlinka» i «Šlachcic Zavalnia, abo Biełaruś u fantastyčnych apaviadańniach». I takija cudy zdarajucca… raz na sto hadoŭ.
