Dźmitryj Filipovič, fota Vadzima Zamiroŭskaha
Ministr abarony Andrej Raŭkoŭ uručyŭ orden «Za asabistuju mužnaść» staršamu lejtenantu Dźmitryju Filipoviču, jaki ŭ sakaviku vyratavaŭ sałdata terminovaj słužby pry vybuchu bajavoj hranaty ŭ akopie. Aficer siońnia atrymaŭ uznaharodu z ruk ministra ŭ muziei Vialikaj Ajčynnaj vajny, piša BiełTA.
Jak raspavioŭ Dźmitryj Filipovič, vajskoviec, jakoha jon vyratavaŭ, užo skončyŭ navučańnie: «Vučyŭsia jon na kamandzira adździaleńnia. Pa raźmierkavańni źjechaŭ słužyć u 120-ju asobnuju miechanizavanuju bryhadu». Pa słovach aficera, paśla hetaha vypadku jon staŭ jašče bolš upeŭnieny ŭ tym, što pravilna vybraŭ prafiesiju.
14 sakavika padčas płanavych zaniatkaŭ pa ahniavoj padrychtoŭcy ŭ navučalnym centry ŭ Piečach 24-hadovy vajskoviec terminovaj słužby Pavieł Bacianoŭski vypuściŭ bajavuju hranatu RHD-5 u akop. Kiraŭnik zaniatkaŭ — staršy lejtenant Dźmitryj Filipovič — pasprabavaŭ vykinuć hranatu, i jana ŭpała ŭ vuhał. Aficer zakryŭ padnačalenaha svaim ciełam. Abodva vajskoŭcy atrymali niaznačnyja traŭmy noh, im była akazana pieršaja miedycynskaja dapamoha. Paźniej abodvuch dastavili dla lačeńnia ŭ Minsk.
Aficer, jaki vyratavaŭ sałdata: Uziaŭ hranatu rukami, ale niedastatkova vysoka kinuŭ
