Z novaha hoda ŭ Biełarusi ŭstalujuć novyja hraničnyja adpusknyja ceny na impartnyja leki, jakija buduć nižejšymi, čym ciapier. Pra heta zajaviŭ 2 kastryčnika ŭ parłamiencie ministr achovy zdaroŭja Uładzimir Karanik, pieradaje Jeŭraradyjo.
Pavodle jaho słoŭ, da źnižeńnia cen Ministerstva achovy zdaroŭja padšturchnuli vyniki analizu cen na preparaty ŭ Biełarusi i susiednich krainach.
Akramia ŭłasnaha daśledavańnia rynku lekaŭ, Ministerstva achovy zdaroŭja paprasiła karystalnikaŭ Fejsbuka paviedamić, jakija leki jany kuplajuć u aptekach za miažoj tańniej, čym u Biełarusi. «Byli vyniki našaha analizu, dzie my bačyli, što ceny zavyšanyja. Častka z preparataŭ, na jakija nasielnictva źviarnuła ŭvahu. Usie jany ŭvajšli ŭ novy pieralik preparataŭ, na jakija z novaha hoda treba budzie zarehistravać novuju limitavuju adpusknuju canu i pryčym ekanamična jaje abhruntavać», — paviedamiŭ Karanik.
Pa słovach ministra, pastaŭščykoŭ lekaŭ takija miery nie napałochali, amal usie jany ŭžo pahadzilisia z patrabavańniami Ministerstva achovy zdaroŭja. Hraničnyja adpusknyja ceny na leki ŭstaloŭvajucca štohod, i za ŭvieś čas tolki 4 preparaty syšło ź biełaruskaha rynku z-za niazhody pastaŭščykoŭ na ŭmovy Ministerstva achovy zdaroŭja.
«Na siońnia try ź ich my zamianili inšymi pastaŭščykami, a ŭ dačynieńni da čaćviortaha my zapuścili praceduru prymusovaj rehistracyi. Heta robicca razam ź Ministerstvam antymanapolnaha rehulavańnia i handlu, kali preparat zajmaje daminujučaje stanovišča na rynku», — raspavioŭ kiraŭnik Ministerstva achovy zdaroŭja.
Siarod lekaŭ, na jakija ŭstalujuć hraničnyja ceny, ankałahičnyja preparaty, sardečna-sasudzistyja, dla lačeńnia zachvorvańniaŭ stravavalnaha trakta i inšyja.
