Eks-sienatar Kałumbii Aida Mierłan, prysudžanaja da 15 hadoŭ pazbaŭleńnia voli za podkup hałasoŭ i niezakonnaje vałodańnie zbrojaj, źbiehła padčas pryjomu ŭ stamatołaha ŭ aŭtorak. Pra heta paviedamlaje Inpec Colombia (Nacyjanalny instytut papraŭčych i kryminalna-vykanaŭčych ustanoŭ) na staroncy ŭ Twitter.
U aŭtorak ranicaj Mierłan była pryvieziena z turmy «El-Buena-Pastar» u stamatałohiju ŭ paŭnočnaj častcy Bahaty ŭ słužbovaj mašynie papraŭčaj ustanovy, paviedamlaje miascovaja hazieta El Tiempo.
Z kabinieta stamatołaha eks-sienatar vylezła ŭ akno z dapamohaj viaroŭki, paśla čaho źjechała na matacykle ź nieviadomym kiroŭcam. Stamatołah taksama paśpiešliva pakinuŭ miedycynski centr.
U siaredzinie vieraśnia Viarchoŭny sud Kałumbii prysudziŭ eks-sienatara da 15 hadoŭ turmy za złačynstvy pa skupcy hałasoŭ i niezakonnaje našeńnie zbroi. Abvinavačvańnie Mierłan źviazana z rejdam, praviedzienym prakuraturaj u sakaviku 2018 hoda ŭ jaje pieradvybarnym štabie padčas vybaraŭ u zakanadaŭčyja orhany Kałumbii.
Padčas pieratrusu supracoŭniki pravaachoŭnych orhanaŭ vyjavili dokazy isnavańnia sietki dla podkupu hałasoŭ. Paźniej sud vyśvietliŭ, što eks-sienatar taksama padkuplała miascovych palitykaŭ i pieravysiła maksimalny limit vydatkaŭ, dazvoleny dla kožnaha kandydata.
