Siońnia Park vysokich technałohij staŭ vialikaj prezientacyjnaj placoŭkaj dla novych miedycynskich prajektaŭ. Dyrektar PVT Usievaład Jančeŭski pakazaŭ pieradavyja raspracoŭki pieršamu namieśniku premjer-ministra Alaksandr Turčynu i kiraŭnictvu Ministerstva achovy zdaroŭja.
Usievaład Jančeŭski i Alaksandr Turčyn. Fota pres-słužby PVT.
Udzielniki vystavy mahli pratestavać IT-rašeńni, jakija byli pradstaŭleny ŭ biznes-inkubatary parku. Jančeŭski zapuściŭ miedycynski 3D-pryntar — «ličbavaha stamatołaha». Za čas mierapryjemstva stanok razdrukavaŭ nieabchodnyja impłanty dla pracy lekara.
Pradstaŭnikam Ministerstva achovy zdaroŭja pakazali prajekty PVT, jakija stvarajucca ŭ kałabaracyi ź lekarami. Startap Skinive vykarystoŭvaje niejrasieciva dla vyznačeńnia prablemnych učastkaŭ skury z dapamohaj kamiery smartfona. Raspracoŭka dapamahaje ŭ vyjaŭleńni ryzyk ankałahičnych zachvorvańniaŭ i nakiroŭvaje infarmacyju ab tryvožnych simptomach śpiecyjalistam.
Na adnym sa stendaŭ ŭdzielniki pratestavali šlem virtualnaj realnaści, jaki vykarystoŭvajuć dla reabilitacyi dziaciej z DCP. Technałohiju startapa GKeyLab taksama płanujuć vykarystoŭvać dla lačeńnia šyzafrenii.
Miedykaŭ zacikaviŭ niejranavihatar dla chirurhaŭ ad kampanii Promwad. Śpiecyjalnaja stancyja dazvalaje minimizavać chirurhičnaje ŭmiašańnie, bolš dakładna kantralavać i płanavać apieracyjnyja pracesy, a taksama pavysić praduktyŭnaść lekara.
Usiaho ŭ Parku vysokich technałohij było pradstaŭlena bolš za 10 inavacyjnych prajektaŭ: źmiašanaja realnaść u traŭmatałohii (Voka.io), hulniavy dadatak dla baraćby z depresijami (Goodville), mabilny kardyjamanitor (Cardio X), skanar sa štučnym intelektam (Aibion), elektronny stetaskop (Healthy Networks), niejraharnitura (PigPug). Śpiecyjalna dla delehacyi praviali treniroŭku pa niejrafitnesie.
Paśla technałahičnaj vystavy PVT i Biełaruski dziaržaŭny miedycynski ŭniviersitet padpisali pahadnieńnie ab supracoŭnictvie. Razmova praciahnułasia ŭ niefarmalnaj abstanoŭcy, dzie byli abmierkavanyja sumiesnyja IT-prajekty dla achovy zdaroŭja. Park pradstaviŭ kartu miedycynskich IT-kampanij Biełarusi. Za apošnija niekalki hadoŭ kolkaść novych rašeńniaŭ u hetaj śfiery pavialičyłasia ŭ niekalki razoŭ.