Hanna Kanapackaja, jakaja sprabuje druhi raz trapić u parłamient i źbiraje podpisy, atrymała ad vybarčaj kamisii papiaredžańnie za parušeńnie zakanadaŭstva.
«Pradmietam abmierkavańnia była skarha vyłučenca ad BRSM (Siarhieja Kliševiča — «NN») pa fakcie ahučvańnia siabram majoj inicyjatyŭnaj hrupy infarmacyi ab zładžanaj Kliševičam bojcy na adkryćci pomnika Leninu la prachadnoj MTZ», — paviedamiła Kanapackaja i rytaryčna spytałasia ŭ aŭdytoryi, ci «musiać vybarcy viedać usiu praŭdu pra čałavieka, jaki navat nie kandydat, kab pryniać rašeńnie, stavić za jaho svoj podpis ci nie?»
Tut majecca na ŭvazie viekapomny fakt ahresii Kliševiča da Daškieviča i kampanii, jakija pryjšli zryvać uračystaje adkryćcio pomnika Leninu ŭ 2016-m.
Siarhiej Kliševič — vyłučeniec ad BRSM i Kamunistyčnaj partyi.
Čytajcie: Hrupa moładzi sarvała adkryćcio pomnika Leninu kala MTZ FOTA, VIDEA
Ale što pra heta kaža sam Kliševič?
Na zvarot «Našaj Nivy» jon dasłaŭ u redakcyju videa, jakoje i stała padstavaj da vyniasieńnie papiaredžańnia: na im vidać, jak čałaviek z partretam Kanapackaj kryčyć u hukaŭzmacnialnik pra toje, što «chulihan imkniecca va ŭładu».
«Zajavili pra maje nibyta chulihanskija dziejańni. Ale ja patłumaču nakont taho vypadku na adkryćci pomnika, — kaža Kliševič. — Było aficyjnaje mierapryjemstva pa inicyjatyvie vieteranaŭ Traktarnaha zavodu, uzhodnienaje z usimi orhanami ŭłady, ja byŭ adnym z arhanizataraŭ. U hety čas Daškievič vyskačyŭ na pomnik i pačaŭ vykrykvać pramovy na adras vieteranaŭ pracy, vieteranaŭ Vialikaj Ajčynnaj vajny, jakija tam prysutničali taksama. Ja nie mahu stajać u baku, kali abražajuć ludziej pracy. Ja ŭžyŭ dziejańni suprać jahonych dziejańniaŭ. I chulihanstva ŭ maich dziejańniach nie było — heta jurydyčna zafiksavana, mianie nie sudzili za chulihanstva, a voś dziejańniam Daškieviča była dadziena acenka ŭ sudzie. U takim razie śćviardžać, što ja chulihan — heta padmanvać ludziej, heta parušeńnie 155 artykuła Vybarčaha kodeksu. Prykra, što dziejny deputat parušaje zakony».
Ale ž Daškievič kryčaŭ tolki biezadrasnaje słova «hańba»?
«Kamu hańba? Vieteranam pracy, jakija stvaryli zavod, što prynosić nam vialikija hrošy? Leninu? Ja baču abrazu ludziej, jakija tam sabralisia, a nie Leninu. Siońnia ja b pastupiŭ hetak ža», — zapeŭnivaje kamunist.