Praciŭniki akumulatarnaha zavodu na mitynhu ŭ Bieraści, 3 listapada.

Praciŭniki akumulatarnaha zavodu na mitynhu ŭ Bieraści, 3 listapada.

Vialiki mitynh praciŭnikaŭ budaŭnictva akumulatarnaha zavoda la Bieraścia byŭ zaplanavany na 3 listapada ŭ jakaści pieradvybarčaha mierapryjemstva adzinaha zarehistravanaha ŭ jakaści kandydata ŭ deputaty aktyvista Uładzimira Maroza, piša Radyjo Svaboda.

Adnak za dva dni da praviadzieńnia mitynhu Maroza źniali z udziełu ŭ vybarach rašeńniem terytaryjalnaj vybarčaj kamisii, jakaja paviedamiła ab vyjaŭlenych parušeńniach z boku Maroza. Niahledziačy na heta anansavany mitynh adbyŭsia amal u tym samym miescy i ŭ toj samy čas.

Aktyvistaŭ padtrymali kandydaty ad Biełaruskaj sacyjał-demakratyčnaj partyi «Hramada» Ihar Masłoŭski i Hanna Kanius. Na placoŭcy nasuprać bieraściejskaha pałacu kultury Prafsajuzaŭ sabrałasia kala 200 čałaviek.

Ihar Masłoŭski

Ihar Masłoŭski

«My ad samaha pačatku byli na baku pratestoŭcaŭ, jašče ŭ pieršym schodzie ŭ Telmach udzielničali, — raskazaŭ Svabodzie Ihar Masłoŭski. — Mahčyma, nie tak aktyŭna heta było, ale my zaŭsiody vystupali suprać hetaha pradpryjemstva ŭ takoj formie, u jakoj jano budavałasia. Tamu zaraz vyrašyli padtrymać aktyvistaŭ, zaprasić ich vystupić na našym pikiecie.

Ci nie bajusia ja, što ŭłady zdymuć mianie i Hannu z vybaraŭ paśla hetaha? My ŭsio robim pa zakonie, u nas niama parušeńniaŭ. Kali niejkija zachady buduć z boku ŭładaŭ, my možam źniać usich svaich kandydataŭ pa Bieraściejskaj vobłaści z vybaraŭ. Heta dzieviać čałaviek. My hatovyja i da hetaha».

Akramia Ihara Masłoŭskaha i Hanny Kanius na pikiecie vystupili taksama aktyvisty Dźmitryj Biekaluk, Alaksandar Kabanaŭ, Siarhiej Piatruchin i inšyja. Źniaty z vybaraŭ kandydat ad «akumulatarščykaŭ» Uładzimir Maroz taksama byŭ na mitynhu, adnak z pramovaj nie vystupaŭ.

Błohier Siarhiej Piatruchin

Błohier Siarhiej Piatruchin

«Jak mianie zdymali, heta cełaja kamedyja była, — raskazaŭ Svabodzie Maroz. — Zvanić pačali jašče ŭ čaćvier uviečary, užo paśla zaviaršeńnia pracoŭnaha dnia. Ja byŭ zaniaty, nie čuŭ telefona. Potym hladžu — a tam 27 prapuščanych. Ad staršyni vybarčaj kamisii. Zvaniu, zaprašajuć prychodzić na pasiedžańnie.

Pryjšli my, naziralniki ad ABSE. Ulotki hetyja adniekul źjavilisia (Maroza abvinavacili ŭ vyrabie niezakonnych ahitacyjnych materyjałaŭ. — RS). Ja da ich nijakaha dačynieńnia nie maju. Tolki pasiedžańnie končyli, mnie adrazu papieru na podpis dajuć. Pra toje, što mianie zdymajuć z vybaraŭ. Ja kažu, dyk kamisija tolki sabrałasia, adkul u vas užo rašeńnie hatovaje jość? Cyrk».

Pa słovach užo byłoha kandydata ŭ deputaty, pavodle zakonu jon maje try dni na abskardžańnie rašeńnia vybarčaj kamisii, adnak mitynh jamu zabaranili pravodzić užo ŭ piatnicu. Na vykazvańnie Alaksandra Łukašenki ab kandydatach-«akumulatarščykach», jakija irvucca ŭ Miensk, Maroz taksama reahuje emacyjna.

«Heta my što, tut dva hady zmahajemsia tolki dla taho, kab u Miensk pierajechać? — pytajecca Maroz. — Ja tut dla taho, kab moj dzicionak zdarovy ros, a nie kab niekudy pierajechać. My tut usie dziela svaich dziaciej, u kaho chočacie zapytajcie. I ja vam jašče raz skažu — zavod pracavać nie budzie. My ŭsie tut supraciŭlajemsia zakonnymi metadami, nie treba nas pravakavać».

Mitynh praciahvaŭsia krychu bolš za hadzinu, milicyjantaŭ u formie vakoł zaŭvažana nie było, praviadzieńniu mierapryjemstva nichto nie pieraškadžaŭ. Nastupnyja akcyi aktyvisty planujuć pravieści praz tydzień. Pa ich słovach, tak zvanaja «śvincovaja varta» la budynku zavoda i karmleńnie hałuboŭ na hałoŭnaj płoščy Bieraścia taksama buduć praciahvacca da kančatkovaha zakryćcia zavoda kampanii «Aj-Pauer».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?