thephuketnews.com
Ranicaj 2 listapada ŭ Tajłandzie pošukavaja kamanda znajšła cieła mužčyny. Pa niekatorych dadzienych, heta źnikły napiaredadni padčas płavańnia 31-hadovy biełarus, paviedamlaje miascovaje vydańnie The Phuket News, piša Tut.by.
31-hadovy biełarus Maksim Šč. pryjechaŭ u Tajłand razam ź siabroŭkaj. U adzin ź pieršych dzion adpačynku, 30 kastryčnika, jany adpravilisia na plaž Nai Thon.
Pakul dziaŭčyna adpačyvała na bierazie, chłopiec doŭha kupaŭsia — da samaha źmiarkańnia. Kala 19.30 siabroŭka zaŭvažyła, što jaho nidzie niama, i padniała tryvohu. Viadoma, što zona, dzie adpačyvała para, nie patrulujecca ratavalnikami.
Była pačata pošukavaja apieracyja, u joj udzielničali miascovyja ratavalniki, vałanciory i aficery z Nacyjanalnaha parku Sirynat. Akramia taho, karaleŭski fłot Tajłanda daŭ viertalot dla pravierki mora z pavietra.
Ranicaj 2 listapada la bieraha znajšli cieła mužčyny. Ź vialikaj dolaj imaviernaści heta i jość źnikły biełarus, pišuć miascovyja ŚMI: uzrost i adzieńnie supadajuć. Cieła zahinułaha dastaŭlena ŭ balnicu dla apaznańnia i dalejšych pracedur.
Tym časam na indaniezijskim vostravie Bali spynieny aktyŭny pošuk źnikłaha 34-hadovaha biełarusa. Pra heta paviedamlaje miascovaje vydańnie balicitizen sa spasyłkaj na kiraŭnika Nacyjanalnaha ahienctva pošuku i vyratavańnia Basarnas Ady Purnoma.
Nahadajem, prahramist Siarhiej Barbušyn źnik 27 kastryčnika ŭ rajonie 130-mietrovaj skały Tanjung Mebulu. Pobač znajšli arandavanuju im mašynu i telefon unutry. Sam mužčyna, pa zajavie vidavočcaŭ, sarvaŭsia ŭ vadu. Usie hetyja dni dziasiatki čałaviek z pavietra, ziamli i vady šukali cieła biełarusa — ale biespaśpiachova. Miascovyja słužby ličać, što ź vialikaj dolaj vierahodnaści mužčyna zahinuŭ.