Abaroncaŭ Kurapat maładafrontaŭcaŭ Dzianisa Ŭrbanoviča, jahonaha brata Vitala Ŭrbanoviča, Vitala Tryhubava i aktyvista Valera Rabcava buduć sudzić 4 listapada ŭ Mienskim rajonnym sudzie, piša Radyjo Svaboda
Ciapier zatrymanyja znachodziacca ŭ izalatary časovaha ŭtrymańnia na vulicy Skaryny. Pra heta karespandentu Svabody paviedamiŭ dziažurny izalataru. Čas, kali pačnucca administracyjnyja pracesy, pakul nieviadomy.
«U nas šmat pracy, pryviaziom», — skazaŭ dziažurny pra toje, kali aktyvistaŭ paviazuć na sud.
U kancylaryi Mienskaha rajonnaha sudu paviedamili, što spravy na zatrymanych jašče ŭ sud nie pryvozili. Administracyjny praces suprać aktyvista Źmitra Kazakieviča, jak jon sam dumaje, adbudziecca paźniej u Maskoŭskim rajonnym sudzie.
«Nia dumaju, što mianie buduć sudzić siońnia, jak astatnich. Bo, kali vypuskali ź milicyi paśla ŭčorašniaha incydentu, cikavilisia, dzie žyvu ŭ Maskoŭskim rajonie. Značyć, pakul dašluć tudy maje pratakoły, i tolki potym budzie sud», — paviedamiŭ Svabodzie Źmicier Kazakievič.
Zatrymanaha niepaŭnaletniaha aktyvista ŭviečary 3 listapada taksama adpuścili ź milicyi paśla składańnia na jaho pratakoła. Jahonuju spravu budzie razhladać kamisija ŭ spravach niepaŭnaletnich.
3 listapada, nieŭzabavie paśla mitynhu ŭ Kurapatach, kala ŭvachodu ŭ restaracyju «Pojediem pojedim», jakaja znachodzicca pobač z narodnym memaryjałam, adbyłosia sutyknieńnie pikietoŭcaŭ z achoŭnikami ŭstanovy. Vyklikany administracyjaj restaracyi narad milicyi zatrymaŭ šaścioch aktyvistaŭ i dastaviŭ ich u Baraŭlanskaje adździaleńnie milicyi. Aktyvisty kažuć, što paciarpieli ad achoŭnikaŭ i što ich taksama bili ŭ milicejskim aŭtamabili. Staršynia «Maładoha frontu» Dzianis Urbanovič z pastarunku byŭ adviezieny ŭ baraŭlanski špital, dzie jamu akazali medycynskuju dapamohu, a paśla znoŭ zatrymali.
