Dva tydni tamu na jutub-kanale Nexta byŭ vykładzieny hadzinny rolik «Łukašenka. Kryminalnyja materyjały». Za hety čas film pahladzieła bolš za 1,5 miljona karystalnikaŭ. Sapraŭdy, vybuch dla našaj miedyjnaj prastory.
Kali kazać hruba, to ŭ «Kryminalnych materyjałach» vykładałasia toje, što raniej źjaŭlałasia ŭ «Dzikim palavańni» Paŭła Šaramieta, a taksama ŭ «Chrosnym baćku» telekanała NTV. Tolki ŭsio heta było jašče ŭ epochu telebačańnia, a nie jutuba. Heta dastatkova daskanały i prafiesijny pierakaz bijahrafii kiraŭnika krainy, jaki dobra tak prypraŭleny prapahandaj i nieprychavanaj niepryjaźniu.
Adkryćciom jon moh stać tolki dla moładzi, jakaja nie pamiataje praz svoj uzrost pra tyja padziei. Aŭtar videa — błohier Ściapan Śviatłoŭ. Na siońnia niama nikoha, chto chacia b krychu ŭ biełaruskim internecie prybliziŭsia pa papularnaści da Niechty. Jon maje 300 tysiač padpisantaŭ u Jutubie, pad 200 tysiač u Telehramie. I hetaja kolkaść praciahvaje raści.
Ściapanu Śviatłovu (tak zavuć Niechtu) 21 hod. Apošnija hady jon žyvie ŭ Polščy, paśla taho, jak u Biełarusi na jaho zaviali kryminalnuju spravu. Pracuje na telekanale «Biełsat». Niechta staŭ adnym z samych zaciatych i pryncypovych krytykaŭ Łukašenki i hetaj sistemy.
Paśla pośpiechu filmu Niechta zaklikaŭ ludziej pryjści 8 listapada na akcyju pratestu na płošču Svabody. Pryčym afišavałasia, što akcyja budzie dazvolenaj u ramkach pikieta kandydata ŭ deputaty. Takim kandydatam staŭ błohier Mikałaj Masłoŭski, jaki bałatujecca pa Kalvaryjskaj akruzie.
Što było na płoščy Svabody? Ułady taksama padrychtavalisia da akcyi. Z namiotu deputatki Pałaty pradstaŭnikoŭ Sajhanavaj hučaŭ Saładucha «Zdravstvuj, čužaja miłaja». Kamunist Kliševič pajšoŭ dalej — i zładziŭ dyskateku. Dastakova psichadeličnaje vidovišča, kali ludzi ŭ čyrvonych kurtkach tancujuć na choładzie la pikieta kandydata ŭ deputaty. Zrešty, ich chiba nie duža cikaviła pytańnie, ci nie paličyć ich chto za dzivakoŭ.
Najlepšyja miescy la ratušy byli razabranyja, tamu ŭdzielnikam akcyi Niechty daviałosia raźmiaščacca ŭ skvieryku la haścinicy «Jeŭropa» i pomniku Duninu-Marcinkievič i Maniušku. Sprabavali navat zaleźci na traktary, ale adtul ich chutka ściahnuli. Uvohule ŭ samym pačatku adbyłasia nievialikaja bojka ź ludźmi ŭ cyvilnym. U vyniku čaho złamali kardonnaha Niechtu (nie chvalujciesia, potym znajšoŭsia jašče adzin) i złamali hukaŭzmacnialnuju techniku.
Mabyć, heta i stała adnym z klučavych momantaŭ. Biez techniki było ciažka dakryčacca da ludziej. Čutna było tolki tym, chto znachodziŭsia ŭ niepasrednaj blizkaści ad vystupoŭcaŭ. Adydzi na paru krokaŭ i pałymianych pramovaŭ amal nie čuvać. U takich umovach mnohim ludziam tolki i zastavałasia, što tusavacca miž saboj. Było ź dziasiatak bieł-čyrvona-biełych ściahoŭ, niekalki ź ściahoŭ z nadpisami «Niechta».
Kali aceńvać kolkaść udzielnikaŭ, to pa našych padlikach na płošču Svabodu pryjšło kala 500 čałaviek. Heta, kaniečnie, bolš, čym na apošnija akcyi Statkieviča, ale nielha kazać, što bolš našmat. Tak što sapraŭdnaha praryvu ŭsio ž nie adbyłosia.
Mahčyma, arhanizatary płanujuć, što kolkaść udzielnikaŭ budzie raści, jak heta było ŭ 2011 hodzie z maŭklivymi pratestami, ci ŭ 2017 — z darmajedskimi. Tolki tady vostra na paviestcy dnia stajali sacyjalnyja pytańni, a ciapier pytańni padymajucca ci nie całkam palityčnyja. Chacia błohier Uładzimir Cyhanovič i havaryŭ, što ludzi vyžyvajuć i znachodziacca amal u žabračym stanie. Mabyć, mienavita tamu budzie vielmi ciažka pavialičvać kolkaść pratestoŭcaŭ.
Kaardynatar «Jeŭrapiejskaj Biełarusi» Jaŭhien Afnahiel (tak, prysutnaść «Jeŭrapiejskaj Biełarusi» na akcyi była dastatkova vialikaj) zaklikaŭ ludziej sabracca na Kastryčnickaj płoščy praz tydzień, 15 listapada. Dla čaho? Kab dalej praciahvać abmiarkoŭvać film Ściapana. Afnahiel pastaviŭ za metu, kab za tydzień kolkaść prahladaŭ «Kryminalnych materyjałaŭ» dasiahnuła «pałovy nasielnictva Biełarusi».
Pakul vielmi składana skazać, jakim čynam i ŭ što Niechta i jahonyja paplečniki źbirajucca kanviertoŭvać hetyja prahlady na jutubie. Pa akcyi 8 listapada, na jakuju sapraŭdy pryjšła vialikaja kolkaść novych ludziej, bačna, što mnohija ludzi vypuścili paru, zmahli niešta skazać u miehafon, aburycca niespraviadlivaściu. Hałoŭnaje pytańnie dadzienaj situacyi: što dalej? Atrymać na jaho adkaz 8 listapada nie atrymałasia. U vyniku na akcyi atrymałasia jašče taja salanka, na joj možna było pačuć i pra «dzikuju Ardu», i pra admoŭny bałans handlu z Kitajem, i pra dekryminalizacyju narkotykaŭ. Ci maje Niechta płan i stratehiju — pytańnie adkrytaje.
