Na dniach Pucin pravodziŭ uračysty pryjom u honar Dnia narodnaha adzinstva i ŭznaharodziŭ 17 čałaviek dziaržaŭnymi ŭznaharodami za plonnuju pracu na nivie litaratury i mastactva, uzajemaabahačeńnia kultur, nacyj i narodnaściaŭ. Adnym z uznaharodžanych miedalom Puškina staŭ uładalnik i biełaruskaha pašparta Mikałaj Siarhiejeŭ.
Mikałaj Siarhiejeŭ — heta adzin z samych jarkich i zaŭziatych pravadnikoŭ kancepcyi Ruskaha śvietu ŭ Biełarusi, — piša pra jaho analityk Andrej Jelisiejeŭ. — Heta jon rabiŭ zvarot u Słonimski rajvykankam u chodzie niadaŭniaj rezanansnaj historyi napiaredadni Dnia biełaruskaha piśmienstva, śćviardžajučy, što ruskaja mova mieła dziaržaŭny status u VKŁ. Voś niekatoryja ź jaho apošnich publičnych vykazvańniaŭ i cytat z artykułaŭ:
«Palščyzna/biełaruščyna stała šmat u čym vyznačalnaj linijaj dziaržaŭnaj palityki Respubliki Biełaruś u halinie kultury i adukacyi i źjaŭlajecca istotnaj pahrozaj jak dla dalejšaha raźvićcia intehracyjnych pracesaŭ na postsavieckaj prastory, tak i dla ŭłasna Respubliki Biełaruś. Havorka idzie pra niebiaśpieku paŭzučaj transfarmacyi sajuznaj Rasii dziaržavy (to-bok ułasna biełaruskaj) u rusafobskuju i antyrasijskuju».
«Rasija — heta nie tolki terytoryja Rasijskaj Fiederacyi, jakaja ciapier isnuje. Histaryčnaja Rasija — heta značyć faktyčna terytoryja byłoha SSSR… Adnavić cyvilizacyjnuju prysutnaść i ŭpłyŭ Rasii, a značyć i Ruskaha śvietu, u byłych sajuznych respublikach — heta viadoma ž zadača numar adzin, a biełaruska-rasijski sajuz — heta fłahman hetaha».
«Paŭstancy suprać banderaŭskaha nacyzmu ruskija ludzi Kryma i Danbasa puścili pad adchon płany zaakijanskich stratehaŭ pa pieratvareńni Krymskaha paŭvostrava ŭ niepataplalny avijanosiec i rakietnuju bazu NATA, a Ukrainu — u rusafobski taran i vajenny płacdarm suprać Rasii… Litaralna ašaleŭšy i straciŭšy apošnija kropli adkaznaści pierad suhramadzianami, deputaty Rady patrabavali skinuć atamnuju bombu na hałovy niepakorlivych».
Niesumnienna, Mikałaj Siarhiejeŭ zrabiŭ vialiki ŭniosak u aśvietu i vyvučeńnie kulturnaj spadčyny, nadzvyčaj paspryjaŭ zbližeńniu i ŭzajemaŭzbahačeńniu kultur biełaruskaha, ukrainskaha i ruskaha narodaŭ (mienavita za hetaha vydajecca miedal Puškina), čym i zasłužyŭ dziaržaŭnuju ŭznaharodu z ruk samoha Pucina.
Paviedamlajecca, što haściej uračystaha pryjomu častavali pielmieniami z burakami z dušami ź pierapiołki, šarbietam z antonaŭskich jabłykaŭ, marskim akuniom z harodninaj, varoniežskaj jałavičynaj ź piečanaj bulbaj i marozivam ź biełaha šakaładu.