Kala 50 čałaviek 10 listapada ŭziali ŭdzieł u šeści da Łošyckaha jara — miesca rasstrełu achviaraŭ stalinskich represijaŭ, piša radyjo «Svaboda».
Akcyja, arhanizavanaja Kanservatyŭna-chryścijanskaj partyjaj BNF i sankcyjanavanaja haradzkimi ŭładami, pačałasia ŭ 12.30 ad Mienskaha haradzkoha pałaca kultury (były DK kamvolnaha kambinatu).
Udzielniki nieśli transparant «Dziady», bieł-čyrvona-biełyja ściahi, ściahi KCHP-BNF i arhkamitetu pa stvareńni partyi «Biełaruskaja chryścijanskaja demakratyja». Ich supravadžali kala dvuch dziasiatkaŭ siłavikoŭ u cyvilnym, jakija zdymali šeście na videa.
Mitynh u Łošyckim jary doŭžyŭsia kala hadziny. Vystupili namieśnik staršyni KCHP-BNF Juraś Bieleńki i inšyja siabry partyi. Byŭ začytany zvarot lidera KCHP-BNF Zianona Paźniaka.
Šeście i mitynh u Łošyckim jary KCHP-BNF tradycyjna pravodzić praz tydzień paśla analahičnaj akcyi ŭ Kurapatach. Abiedźvie akcyi prymierkavanyja da dnia paminańnia prodkaŭ «Dziady».
Łošycki jar — uročyšča la mikrarajonu Łošyca ŭ Miensku, dzie ŭ 1937-1941 hadach orhany NKUS pravodzili masavyja rasstreły. Dakładnaja kolkaść achviaraŭ nieviadomaja. Pavodle acenak Paźniaka, tut pachavana ad 7 da 10 tysiačaŭ represavanych.
