U Biełarusi stali častymi vypadki telefonnaha machlarstva — višynhu, paviedamlaje ŭpraŭleńnie infarmacyi i hramadskich suviaziej Nacyjanalnaha banka.
Ustanoŭlena, što złamyśniki telefanujuć klijentam biełaruskich bankaŭ i, pradstaŭlajučysia ich supracoŭnikami (u tym liku śpiecyjalistami pa biaśpiecy), pad roznymi padstavami prosiać dać pašpartnyja źviestki, a taksama rekvizity bankaŭskich płaciežnych kartak i kody, jakija pastupajuć na telefonny numar klijenta.
«Źviartajem uvahu, što złamyśniki mohuć vykarystoŭvać prahramy-ananimajziery. U takim vypadku numary telefonaŭ, ź jakich ažyćciaŭlajucca zvanki, vyznačajucca jak aficyjnyja numary, pakazanyja na sajcie banka. Taksama złamyśniki mohuć padmianiać aficyjny numar nie całkam, a tolki adnu jaho ličbu, i vizualna heta padrobka moža być nieprykmietnaj. Pry razmovie dla bolšaj praŭdapadobnaści šumavym fonam pry telefanavańni moža vykarystoŭvacca imitacyja hukaŭ kantakt-centra», — adznačyli ŭ Nacbanku.
Padčas zvanka złamyśniki mohuć prytrymlivacca niekalkich scenaryjaŭ. U pieršym vypadku jany pradstaŭlajucca supracoŭnikami bankaŭ i paviedamlajuć, što ŭ dačynieńni da rachunku klijenta adbyvajucca ašukanskija dziejańni. Z metaj nie dapuścić pieravodu srodkaŭ abo ich atrymańnia najaŭnych u bankamacie jany prosiać dadzienyja bankaŭskaj apłatnaj kartki i inšuju infarmacyju. U druhim vypadku ašukancy ad imia banka paviedamlajuć pra nibyta aformlenuju zajaŭku na kredyt, dla admieny jakoj nieabchodna pradastavić udakładniajučyja źviestki.
«Supracoŭnik banka pry telefanavańni klijentu zahadzia pavinien viedać usie nieabchodnyja jamu dadzienyja. Tamu paviedamlać kamuści rekvizity bankaŭskaj apłatnaj kartki, paroli i kody dostupu, pašpartnyja źviestki ni ŭ jakim razie nielha», — padkreślili ŭ Nacbanku.
Upraŭleńnie abarony infarmacyi Nacyjanalnaha banka (FinCERTby) rekamienduje ŭ vypadku pastupleńnia padobnych zvankoŭ nieadkładna zaviaršyć razmovu i źviarnucca ŭ kantakt-centr banka, emitavana kartku, raspavieści pra situacyju i dalej prytrymlivacca rekamiendacyj. U vypadku, kali złamyśniku ŭsio ž udałosia atrymać rekvizity kartki abo byŭ ustalavany fakt kradziažu hrašovych srodkaŭ, varta nieadkładna zabłakavać kartku i źviarnucca z zajavaj u pravaachoŭnyja orhany.
