U prahramie «Kłub redaktaraŭ» na BT-1 kiraŭniki dziaržaŭnych ŚMI vykazalisia pra cisk z boku Rasii na Biełaruś praź ŚMI.
Padčas pieradačy kiraŭniki biełaruskich ŚMI zakranuli rolik na telekanale Euronews, pryśviečany biełaruskim vybaram.
Hienieralny dyrektar BiełTA Iryna Akułovič zaŭvažyła, što siužet źjaviŭsia tolki ŭ ruskamoŭnym efiry, a na anhłamoŭnym kanale Euronews jaho nie było. Tamu jana vykazała zdahadku, što hety materyjał całkam mahčyma byŭ zamoŭleny nie zachodnimi susiedziami Biełarusi.
«Ja nie ŭpeŭnienaja, što Brusiel tak užo byŭ zacikaŭleny ŭ hetym materyjale. Časam chočacca paŭpłyvać na Biełaruś z roznych bakoŭ, i, pa-mojmu, heta taksama mahčymaść pramacać. Mnie zdajecca, hety materyjał možna razhladać i tak taksama», — dadała kiraŭnica ahienctva.
Hałoŭny redaktar «Sovietskoj Biełorussii» Dźmitryj Žuk zhadaŭ pra artykuł rasijskaj haziety «Kommiersant'», u jakoj na dniach vyjšaŭ materyjał z Vašynhtona: u stalicy ZŠA, pa słovach aŭtara, razvažali, jak dapamahčy Biełarusi, nie dapamahajučy Łukašenku.
«Adkrytaja zakazucha. Nikoli hetaha nie było bačna», — zajaviŭ jon.
Kiraŭnik telekanała ANT Marat Markaŭ zaŭvažyŭ, što materyjał u haziecie «Kommiersant'» padobny da siužeta Euronews: «Technałohija taja ž. Navat padbor słoŭ adnolkavy čamuści».
Dźmitryj Žuk, praciahnuŭšy dyskusiju, nahadaŭ, što Biełaruś nie ŭpieršyniu sutykajecca ź ciskam napiaredadni padpisańnia damoŭlenaściej z Rasijaj.
«Voś navošta heta robicca?» — zadaŭ jon rytaryčnaje pytańnie.
Akułovič zhadała ab niadaŭnim vizicie Alaksandra Łukašenki ŭ Vienu i pajezdcy premjer-ministra Siarhieja Rumasa ŭ Łondan, źviarnuŭšy ŭvahu, što ŭ Biełarusi vystrojvajucca dastatkova blizkija adnosiny z zachodnimi susiedziami.
«Całkam mahčyma, heta razdražniaje, i vykarystoŭvajucca ŭžo trochi inšyja mietady, bolš vostryja», — apisała jana dziejańni rasijskaha boku.
Kiraŭnik ANT Marat Markaŭ byŭ bolš rezkim: «Hałoŭnaje, kab našy sajuźniki nie błytali hnutkaść pazicyi z hnutkaściu śpiny. Kali sapraŭdy siabroŭskija, uzajemavyhadnyja adnosiny, davajcie siabravać biez anijakich prablemaŭ. My realna hatovyja supracoŭničać. Ale kali (prabačcie, moža być niekalki ŭtryravana) jak pierad panam sahnucca — tady nie treba, dziakuj. Maja pazicyja takaja».
