Na biełaruska-polskaj miažy zatrymany 46-hadovy zasnavalnik sajta By24.org Uładzimir Čudziancoŭ, jaki dapamahaŭ błohieru Niechta ŭ padrychtoŭcy filma «Alaksandr Łukašenka. Kryminalnyja materyjały».
U sumcy žurnalista nibyta byli narkotyki. Pakiety z rečyvami znajšli i ŭ jaho minskaj kvatery.
Błohier Niechta rašuča vystupiŭ u padtrymku siabra, adnak žurnalisckaja supolnaść pakul admoŭčvajecca: zanadta nieadnaznačnaja asoba hety Uładzimir Čudziancoŭ.
Adrazu adznačym, što sumnieŭnaja bijahrafija nijak nie tłumačyć toj fakt, što darosły čałaviek dla čahości pajechaŭ praź miažu z pakietam narkotykaŭ — jak minimum u Polščy jany našmat bolš dastupnyja. Znoŭ-taki, źjazdžajučy na doŭhi čas u emihracyju, dziŭna pakidać u svaim pakoi zabaronienyja rečyvy. Asabliva z ulikam asoby Čudziancova, jaki vielmi pilna staviŭsia da pytańniaŭ biaśpieki.
Miarkujučy pa kamientarach u sacyjalnych sietkach i na forumach, bolšaść internet-karystalnikaŭ ličać, što Čudziancovu padkinuli narkotyki. Siłavyja viedamstvy pakul nie kamientujuć situacyju.
Tym časam «Naša Niva» sistematyzavała infarmacyju pra zatrymanaha žurnalista.
Čudziancoŭ, jon ža Zujeŭ
Uładzimir Čudziancoŭ staŭ viadomy internet-karystalnikam u pačatku 2010-ch, kali staŭ pracavać haradskim reparcioram na TUT.by. Pryčym hety sarakahadovy mužčyna źjaviŭsia ŭ miedyjnaj prastory nibyta ź niadkul — nichto nie viedaŭ, adkul jon pryjechaŭ, dzie vučyŭsia i čym zajmaŭsia raniej.
Tajamnica źnikła, kali tahačasny dyrektar Chartyi'97 Fiodar Paŭlučenka apublikavaŭ artykuł «Zabi Čudziancova ŭ sabie».
Vyjaviłasia, što Čudziancoŭ — heta proźvišča žonki žurnalista. Nasamreč jon Zujeŭ. I hety Uładzimir Zujeŭ u 1990-ja pisaŭ u dziaržaŭnych hazietach prapahandysckija brydkaści pra lidaraŭ apazicyi:
«Tak, u 96-m jon pad psieŭdanimam apublikavaŭ u «Narodnaj haziecie» artykuł «Piataje vymiareńnie Hienadzia Karpienki». Karpienka padaŭ u sud i tolki praz paŭtara hoda vyśvietliŭ sapraŭdnaje proźvišča aŭtara (Uładzimir Zujeŭ). Sud zapatrabavaŭ dakumientalnyja dokazy «machinacyj» Karpienki. Zamiest ich małady žurnalist padaŭ čystasardečnaje pryznańnie: «Materyjał pisaŭsia na padstavie dakładnoj zapiski za podpisam kiraŭnika vielmi hroznaha i bujnoha viedamstva, a rašeńnie ab padrychtoŭcy hetaha materyjała prymali jašče bolš vysokapastaŭlenyja ludzi… Što ž da faktaŭ, to za ich dakładnaść pavinny adkazvać tyja, chto mnie ich vydaŭ».
Inšaje pryznańnie Čudziancova było apublikavana ŭ intervju «Svabodnym navinam».
«Pamiatajecie, jak napiaredadni refierendumu z teleekranaŭ ahučvalisia tezisy nibyta beneefaŭskich ulotak, jakija zaklikali narod zapasacca butelkami, kamianiami i iści na šturm rezidencyi prezidenta. Pakolki ja bolš-mienš viedaŭ biełaruskuju movu, mnie i daručyli vydać ekspromt. Tekst ulotak navat byŭ nabrany na kampjutarach u Administracyi prezidenta i razasłany, zaŭvažcie, u dziaržaŭnyja ŚMI», — chvaliŭsia žurnalist.
Muzyka i «Łaskavy maj»
Praca na dziaržaŭnuju prapahandu była nie adzinym zaniatkam Čudziancova. Jon byŭ adnym ź lidaraŭ biełaruskaha fan-kłuba rasijskaha hurta «Łaskavy maj». Kali nie pamiatajecie, heta hurt, składzieny z chłopčykaŭ ź dziciačych damoŭ, jakija śpiavali «Biełyja ružy» i padobnyja papsovyja chity.
«Łaskavy maj» razvaliŭsia ŭ pačatku 1990-ch, ale Čudziancoŭ praciahvaŭ supracoŭnictva z zasnavalnikam hurta Siarhiejem Kuźniacovym. Toj praciahvaŭ pisać pieśni, a žurnalist rabiŭ dla ich aranžyroŭki (nibyta pad psieŭdanimam Jarasłaŭ Nikicin).
Kuźniacoŭ paśla pradziusiravaŭ inšyja dziciačyja hurty, ale biez peŭnaha pośpiechu. Zaadno zajmaŭsia i litaraturaj — pisaŭ pra kachańnie maleńkich chłopčykaŭ da darosłych mužčyn. Cikava, što byłyja ŭdzielniki «Łaskavaha maja» ŭ intervju rasijskim tabłoidam abvinačvali Kuźniacova ŭ piedafilskich schilnaściach.
Maładyja chłopcy
Razmovy pra dziŭnaje siabroŭstva z maładymi chłopcami supravadžali i Čudziancova, pryčym doŭhija hady. Jon apiekavaŭsia jak minimum tryma reparciorami, udvaja maładziejšymi za jaho.
Adrazu ŭdakładnim: nivodnaha dakumientalnaha paćviardžeńnia jahonaj supraćpraŭnaj dziejnaści niama.
«U bolšaści krain Jeŭropy, darečy, uzrost [pałavoj zhody] — uvohule 14 hadoŭ. I tam taksama jość mudaki i isteryčki, jakija biesiacca ad taho, što niechta robić toje, što im samim rabić vielmi chočacca, ale pieraškadžaje rabić ich dałba*bizm (maralny, relihijny), a značyć — heta treba zabaranić. Ale tam zakanadaŭcy — razumnyja ludzi, jakija razumiejuć, što hłupa zabaraniać pałavaśpiełaj asobie naturalnyja rečy», — vykazvaŭsia jon u fejsbuku padčas dyskusii pra piedafiliju.
U miedyjasupolnaści vyklikała ździŭleńnie, kali 40-hadovy Čudziancoŭ (jaki na partale Anłajnier mieŭ nik Vovčik-Morkovčik) paklikaŭ da siabie pažyć 16-hadovaha apazicyjnaha aktyvista, jaki pasvaryŭsia z baćkami i syšoŭ z domu. Ź ciaham času hety chłopiec zaniaŭsia žurnalistykaj i niejki čas pracavaŭ u tandemie z Čudziancovym.
Zabojstva žonki
Arhumient Čudziancova na ŭsie zdahadki byŭ prosty: «Vy što, ja žanaty čałaviek!» Ź Viktoryjaj Čudziancovaj jon pabraŭsia šlubam u 2005 hodzie i ŭziaŭ jaje proźvišča.
U intervju BiełaPANu žurnalist raskazaŭ, što praź niekalki hadoŭ žančyna stała vypivać i pieratvaryłasia ŭ ałkaholika. Jaje kadziravali, adpraŭlali ŭ ŁPP, ale heta nie dapamahała. Nieŭzabavie para raźjechałasia, i Čudziancoŭ viarnuŭsia žyć da mamy. Dziaciej u ich nie było.
Pa słovach žurnalista, žonka tym časam prapiła dźvie svaje kvatery i pazyčyła častku atrymanych hrošaj — $15 tysiač — svajoj najlepšaj siabroŭcy. Taja była pazbaŭlenaja baćkoŭskich pravoŭ i musiła spłacić dziaržavie alimienty na ich utrymańnie.
Hetaja siabroŭka ŭ pjanaj bojcy i zabiła Viktoryju Čudziancovu praź niekalki hadoŭ. Razam z pryjacielami jana pakinuła trup kala adnaho z susiednich damoŭ.
Čudziancoŭ mierkavaŭ, što pieršapačatkova cieła płanavali padkinuć jamu pad bałkon, ale pakolki kampanija była pjanaja, damy jany pierabłytali ci nie dajšli litaralna 15 mietraŭ.
Žurnalista taksama padazravali ŭ datyčnaści da zabojstva, adnak davoli chutka znajšli sapraŭdnych złačyncaŭ.
Ad lubovi da nianaviści — adno zvalnieńnie
Zabojstva žonki adbyłosia ŭ 2016 hodzie, užo paśla jaho skandalnaha sychodu z TUT.by. Čudziancoŭ byŭ adnym z najlepšych reparcioraŭ partała, adnak prynosiŭ haspadaram niamała imidžavych prablem.
Jon byŭ rezki ŭ vykazvańniach, pryčym asabliva nienavidzieŭ dźvie sacyjalnyja hrupy: aŭtamabilistaŭ i haspadaroŭ sabak. I taja, i taja fobija pryjšli ź dziacinstva ci maładości. Usio było banalna: niekali jaho pakusaŭ sabaka, niekali jon trapiŭ u avaryju.
Čudziancoŭ zaklikaŭ da raspravy nad parušalnikami parkoŭki, prapanoŭvaŭ, kab prava na vałodańnie aŭtamabilami vydavali nie ŭsim, a tolki vybranym.
Adnak da jaho zvalnieńnia pryviała zusim inšaja historyja. Zasnavalnik Tut.by Juryj Zisier syšoŭsia ŭ publičnaj palemicy z hałoŭnaj redaktarkaj Chartyi'97 Natallaj Radzinaj. I Čudziancoŭ u kamientach u fejsbuku rašuča padtrymaŭ pracadaŭcu.
«My krucimsia, raźvivajemsia, raściem i vydatna zarablajem, niahledziačy na «kryvavuju dyktaturu», jakaja nasamreč nie takaja i dyktatura, kali nie pavodzić siabie jak ciešča z aniekdota, jakaja *rała ŭ boršč maładym, a kali atrymlivała za heta pa tvary, kryčała «Niadobryja vy, syjdu ad vas!». Źjechali — nie leźcie ŭ našyja spravy. Ludzi, jakija z-za buhra hadziać, vyklikajuć u mianie razdražnieńnie. Tak, mnie šmat što tut nie padabajecca, i ŭłada ŭ tym liku. Ale źmianiać jaje — naša prablema, a nie vaša. Kali niechta, chto smokča hranty, patrabuje ekanamičnych sankcyj, a značyć, žadaje krachu ekanomicy majoj krainy, maim rekłamadaŭcam i klijentam, dziakujučy jakim ja atrymlivaju zarobak i hanarary, to hety čałaviek aŭtamatyčna stanovicca maim asabistym voraham», — napisaŭ jon. Paśla hetaha kamienta žurnalisty Chartyi'97 i raskazali ŭsim, što Čudziancoŭ — nasamreč Zujeŭ.
Internet-aŭdytoryja patrabavała ad Juryja Zisiera zvolnić eks-prapahandysta. Toj pryniaŭ kampramisnaje rašeńnie: ad Čudziancova patrabavałasia syści z sacsietak, adnak zastacca rabotnikam partała.
Čudziancoŭ pratrymaŭsia adzin dzień, a paśla znoŭ pajšoŭ u ataku ŭ fejsbuku. Usio skončyłasia zvalnieńniem žurnalista i jaho abiacańniem padać u sud na «Našu Nivu».
Da suda jon, naturalna, nie dajšoŭ, ale z taho času ŭźnienavidzieŭ Zisiera ŭ pryvatnaści i Tut.by u cełym. Kali pačałasia «sprava BiełTA» i redaktaraŭ Tut.by adpravili na Akreścina, Čudziancoŭ nie chavaŭ radaści: «Uzdymu kielich za spraviadlivaść».
Sam sabie haspadar
Zastaŭšysia biez zarobku, Čudziancoŭ zasnavaŭ svoj sajt By24.org — sajt z treš-navinami nakštałt «Na poŭdzień Rasii napali strašnyja kamary-zabojcy». Raźlik byŭ na klikbejtnyja zahałoŭki, vysokuju naviedvalnaść z Rasii i, adpaviedna, atrymańnie dachodu ad rekłamy Jandeksa i Huhła.
Pa słovach Čudziancova, sajt prynosiŭ jamu da $500 na miesiac, što dazvalała zvodzić kancy z kancami.
Jon byŭ adzinym žurnalistam i redaktaram sajta, tolki časam pryciahvaŭ maładych chłopcaŭ, znajomych jamu pa raniejšaj supracy.
Paśla 2014 hoda i zachopu Kryma pohlady Čudziancova kardynalna źmianilisia. Jon uźnienavidzieŭ Rasiju i zaniaŭsia na svaim sajcie zaciataj antykramloŭskaj prapahandaj. Navinaŭ kštałtu «Na śviežym fota Pucina zaŭvažyli puchlinu», «Dvajnik Pucina zabivaje babulek u Minsku», «Tolki adzin žychar RF pieravioŭ Pucinu hrošy na vybary» stała ŭ razy bolš.
Čudziancoŭ navat pieradavaŭ hrošy biełaruskim dobraachvotnikam va Ukrainu. Paśla heta stała adnym z arhumientaŭ u sudzie pa spravie ab najmictvie.
Supracoŭnictva ź Niechta
Adnak ź ciaham času sajt staŭ abnaŭlacca radziej. Krynicy «NN» śćviardžajuć, što Čudziancoŭ aktyŭna zaniaŭsia supracaj z błohieram Niechta (Ściapan Puciła), jaki žyvie ŭ Varšavie.
Sprava ŭ tym, što žurnalist jašče z 1990-ch byŭ siabravaŭ z baćkam Niechta, spartyŭnym kamientataram BT Alaksandram Puciłam. Dy i z samim Ściapanam jon paznajomiŭsia, kali toj jašče byŭ padletkam.
Zadača Čudziancova była ŭ tym, kab nadavać dopisam u telehram-kanale Niechta dadatkovuju publicystyčnaść.
Niekatory čas tamu Čudziancoŭ paviedamiŭ siabram, što atrymaŭ zaprašeńnie na lehalnuju pracu ŭ Polščy. Z hetym dakumientam jon atrymaŭ vizu i sieŭ na ciahnik na Varšavu. Da Polščy Čudziancoŭ nie dajechaŭ.
Na praciahu 72 hadzin ad momantu zatrymańnia jamu musić być vystaŭlena abvinavačvańnie.
